Сұрақ: Исламда ізгі амал жасамаған адамдарды не деп атайды?
Жауап: Расында да Ислам адам баласын жақсылыққа шақырып қана қоймай, сол жақсылықтың орындаушысы бол деп те әмір етеді. Ізгілік үшін мол сауаппен қатар, ақыретте үлкен сыйлықтар уәде етіледі.
Ал енді ізгі амал жасамаған, жақсылығына қарағанда жамандығы көп болған пендені «асхаб әш-шимәл» деп атайды, мағынасы: «сол жақтық». Себебі Алла иман келтірмеген, ізгі амал жасамаған амал дәптері сол жағынан беріліп, жазаға тартылатындар.
Құран бұлар жайында: «Кітабы сол қолына берілгендер болса, былай дейді: «Қап, кітабым маған берілмегенде ғой… Есебімнің де қандай екенін білмей-ақ қойғанымда болар еді. Малым, маған еш пайда бермеді. Күш-қуатым жойылып кетті» (дейді)», – деп баяндайды («Хаққа» сүресі, 25-33).
Өзінің амал дәптерін көргенде, әркімнің онда жазылғандарды оқып, қатты таңғалатыны айтылады. Өйткені өмірінде жасаған әрбір ісінің бүге-шүгесіне дейін түк қалдырмай тіркелгенін көреді.
Құран олардың таңғалып былай дейтіндерін айтады: «Мәссаған, мынау не деген дәптер десеңші, ірі-ұсақ демей бәрін жинапты» («Кәһф» сүресі, 49).
Анығында ол дәптердің қалай толтырылатыны әрбір адамның өзіне байланысты…
Жалғас САДУАХАСҰЛЫ
