Сұрақ: Өзге діннің табынатын құдайларына тіл тигізу дұрыс па?
Жауап: Еліміз аумағында түрлі ұлттар мен конфессиялар бейбіт өмір сүруде. Дәстүрлі Ислам өзге діннің құлшылықтары мен ғибадатханаларына құрметпен қарайтын бейбіт дін. Исламның тағылымы өзгенің діни наным-сенімдері мен қасиетті құндылықтарына тіл тигізуге тыйым салады. Зайырлылық құндылықтарында да әрбір адамның ар-ождан және діни сенім бостандығы қорғалады.
Ал, дін атын жамылған ағымдар мен секталардың мақсаты – діни құндылықтарды жойып, қоғамда дінараздық алауыздық қоздырып, діни сенімдеріне тіл тигізіп адамдар арасында іріткі және қақтығыстар тудыру. Діни алауыздықты ұрандатып жүрген жалған шейхсымақтардан сақ болғанымыз абзал.
Дәстүрлі Ислам тағаттылық пен төзімділікке шақырады. «Әнғам» сүресінің 108-аятында: «Олардың Алладан басқа тәңір тұтып, жалынып-жалбарынатын құдайларына тіл тигізбеңдер. Әйтпесе, олар да надандықпен һәм өшпенділікпен Аллаға тіл тигізіп, шектен шығады», деген.
«Өз дініңе берік бол! Өзге дінді құрмет тұт» деген танымда жүру әрбір саналы адамға міндет екен. Дінде фанатизмге бой алдырмай орта жолды ұстану – заман талабы.
Икрам АЙТАЕВ
