Түркістан қаласында Қожа Ахмет Ясауидің рухани мұрасын зерделеу мен кеңінен насихаттау мақсатында «Ясауи керуені» ғылыми-ағартушылық семинары өтті.
Жоба Мемлекет басшысы Қасым-Жомарт Тоқаевтың Қожа Ахмет Ясауидің өмірі мен тағылымын елімізде және халықаралық деңгейде кеңінен дәріптеу жөніндегі тапсырмасын іске асыру аясында қолға алынды.
Іс-шараға мемлекеттік органдардың өкілдері, ғалымдар, теологтар, дінтанушылар, мәдениет қайраткерлері, жастар және бұқаралық ақпарат құралдарының өкілдері қатысты.
Семинар барысында Ясауи ілімінің тарихи және рухани маңызы, «Диуани хикмет» еңбегіндегі адамгершілік құндылықтар, ойшыл мұрасының ұлттық бірегейлікті нығайтудағы және рухани құндылықтарды дәріптеудегі орны кеңінен сөз болды.
Жиында Қожа Ахмет Ясауи атындағы Халықаралық қазақ-түрік университетінің профессоры Досай Кенжетай, оқу орнының доценті Сержан Оразбай, «Ясауитану» ғылыми-зерттеу институтының директоры Бауыржан Сайфунов және философия докторы Мұхит Төлеген ғылыми баяндамалар жасады. Ғалымдар өз баяндамаларында Ясауи ілімінің ұлттық сананың қалыптасуына ықпалы, хикметтердің тәрбиелік мәні, ойшыл мұрасы мен қазақ халқының дәстүрі арасындағы тарихи сабақтастыққа жан-жақты тоқталды.
