Қоғамдық орындардағы әдептілік – адам баласының тәрбиесі мен имандылығының айқын көрінісі.
Жалпы, қоғамдық тәртіп – бұл тек полицияның немесе мемлекеттік органдардың ғана міндеті емес, бұл әрқайсымыздың ортақ жауапкершілігіміз. Асыл дініміз қоғамның тыныштығын бұзатын кез-келген әрекетті «бүлік» деп атап, оған қатаң тыйым салған. Қасиетті Құранда: «Жер беті түзелгеннен кейін онда бүлік шығармаңдар яғни тәртіпті бұзбаңдар..», – д. (Ағраф-56-аят).
Алла Тағала жер бетінде белгілі бір жүйе мен тәртіп орнатты. Қоғамдық ортаны ластау, мемлекет мүлкін бүлдіру немесе көпшілік орныдарда адамдардың мазасын алу – осы иләһи тәртіпке қарсы шығу болып табылады. Ислам – тек құлшылықтан ғана тұратын жүйе емес, ол адамдар арасындағы қарым-қатынасты, көркем мінез бен әдептілікті ең жоғары орынға қоятын кемел жол. Қоғамдық орындарда қатты дауыс көтеріп сөйлеу, былапыт, дөрекі сөздер айту, кісінің ар-намысына тию – мұсылманға жат қылық. Мұндай әрекеттер тек заң алдында ғана емес, біздің дәстүрлі құндылықтарымыз бен мұсылмандық қағидаларына мүлдем жат қылықтар екенін де ұмытпайық.
Құранда Лұқман хакімнің баласына айтқан өсиетінде: «Жүрісіңде орташа бол және дауысыңды бәсеңдет…»-д. (Лұқман-19-аят). Ардақты пайғамбарымыз «Нағыз мұсылман – өзге адамдарға тілімен де, қолымен де зиян келтірмеген адам», – деп ескерткен. Сондай-ақ мына көпшілік орындарда тазалыққа мән беру. Көшелер мен саябақтарды, қоғамдық орындарды таза ұстау – әрбір азаматтың ар-ұят, имандылық деңгейін көрсетеді. Жолға, аялдамаларға, қоқыс тастау, түкіру-бүлдіру – өзге адамдардың хақысын жеумен тең. Қоғамдық орындарда әдеп сақтау – бұл тек заң талабы емес, бұл – Алла алдындағы есеп пен адамдардың алдындағы жауапкершілік. Қадірлі ағайын! Әрқайсымыз қоғамдық тәртіпке бейжай қарамай, өзімізден бастап өзгеге үлгі болайық. Тәртіпті қоғам – берекелі қоғам. Көркем сұлулық пен мәдениет – өзіміз тұратын ауладан, өз қаламыздан; өзіміз сөйлейтін сөзден бастау алатынын ұмытпайық!
Қостанай облысының Бас имамы Бектұрсын қажы Торғайбайұлы
