Қазіргі жаһандану дәуірінде адамзат алдында тұрған ең күрделі мәселелердің бірі – терроризм. Ол белгілі бір аймақтың ғана емес, бүкіл әлемнің тұрақтылығы мен қауіпсіздігіне қауіп төндіретін күрделі құбылысқа айналды.
Терроризм – қорқыныш пен үрей арқылы саяси, діни немесе идеологиялық мақсатқа жетуді көздейтін зорлық-зомбылық әрекеттерінің жиынтығы. Бұл құбылыс қоғамның тыныштығын бұзып қана қоймай, мемлекеттің іргетасын шайқалтуға бағытталған.
Терроризмнің тамыры тереңде жатыр. Оның пайда болуына әлеуметтік теңсіздік, діни сауатсыздық, саяси тұрақсыздық, кедейлік пен жұмыссыздық секілді факторлар әсер етеді. Осындай күрделі жағдайларда кейбір адамдар радикалды идеялардың жетегінде кетіп, экстремистік топтардың құралына айналады. Олар үшін адам өмірінің құны төмендеп, зорлық-зомбылық «мақсатқа жетудің жолы» ретінде қабылданады. Терроризмнің ең қауіпті тұсы – оның шекара талғамайтындығы. Бір елде басталған қауіп екінші елге оңай таралып, халықаралық сипат алады. Ақпараттық технологиялардың дамуы да бұл қатерді күшейтіп отыр. Интернет арқылы радикалды идеялар тез таралып, жастардың санасын улап, оларды адастыруда. Сондықтан қазіргі терроризм тек қарумен емес, идеологиямен де күресуді талап етеді.
Мемлекеттің қауіпсіздігін қамтамасыз ету – ең басты міндеттердің бірі. Бұл бағытта құқық қорғау органдарының күшімен қатар, қоғамның да рөлі зор. Әрбір азамат ел тыныштығына жауапкершілікпен қарап, күмәнді әрекеттерге бейжай қарамауы тиіс. Сонымен қатар, жастарға дұрыс тәрбие беру, сапалы біліммен қамту, олардың сыни ойлау қабілетін дамыту – терроризмнің алдын алудың тиімді жолдарының бірі. Дін мәселесі де ерекше назарды қажет етеді. Дін – бейбітшілік пен ізгіліктің бастауы. Алайда оны теріс түсіндіру, өз мүддесіне пайдалану – үлкен қауіп. Сондықтан діни сауаттылықты арттыру, дәстүрлі құндылықтарды насихаттау – қоғам тұрақтылығының кепілі.
Яғни, терроризм – адамзатқа ортақ жаһандық қауіп. Оған бір мемлекет қана емес, бүкіл әлем қауымдастығының бірлескен әрекеті қажет. Бейбітшілік пен тұрақтылық – ең қымбат құндылық. Сол себепті әрбір адам өз елінің тыныштығын сақтауға үлес қосуы тиіс. Тек бірлік пен парасаттылық арқылы ғана біз бұл қатерге қарсы тұра аламыз.
Балауса СЫЗДЫҚОВА,
Қызылорда облысы дін істері
басқармасы «Дін мәселелерін зерттеу
орталығының» журналист маманы
