Халықаралық талма дертімен күрес күні аясында қайырымдылық шарасы ұйымдастырылды.
Бұл күн – Эпилепсия дертімен күресіп жүрген жандарға қолдау білдіріп, қоғам назарын маңызды денсаулық мәселесіне аударуға бағытталған ерекше дата.
Аталған шара барысында Neuro&Vivo медициналық орталығында Зекет және қайырымдылық қорының қолдауымен 10 мұқтаж отбасының балаларына «Тегін медициналық тексеру және дәрігерлік кеңес» сертификаттары табысталды.
Сертификаттар балалардың денсаулығын жан-жақты тексеруден өткізіп, білікті мамандардан кәсіби кеңес алуына мүмкіндік береді. Бұл бастама ата-аналардың алаңдаушылығын азайтып, балалардың саулығына нақты қолдау көрсетеді.
Іс-шара аясында ата-аналарға дастархан жайылып, балаларға арнайы сыйлықтар ұсынылды.
Талма дерті – тұрақты бақылау мен кәсіби медициналық көмекті қажет ететін күрделі ауру. Сондықтан мұндай әлеуметтік жобалар балалардың өмір сапасын жақсартуға және дер кезінде ем алуына жол ашады.
Ұйымдастырушылардың айтуынша, басты мақсат – дертпен күресіп жүрген балалардың жалғыз емес екенін сезіндіру және оларға үміт сыйлау.
