Сұрақ: Діни тұрақтылықтың маңызы неде?
Жауап: Елімізде түрлі этнос өкілдері мен конфессия өкілдері татулықты сақтап, бейбіт өмір сүруде. Дәстүрлі діндердің мақсаты – халық арасында тұрақтылық пен бірлікті сақтау. Қоғамдағы түрлі дінді ұстанатын немесе ұстанбайтын адамдар бар екендігі белгілі. Ал, қоғамда діни татулық болмаса, түсініспеушілік пен дінараздық жанжалдар туындайды.
Тарихта діни талас-тартыстар мен қайшылықтар кейде үлкен қақтығыстарға алып келгені белгілі. Сондықтан діни татулық адамдарды бір-бірінің салт санасы мен сенімін сыйлауға үйретеді. Бұл қоғамда төзімділік пен адамгершілік танымын арттырады. Бір-біріне құрметпен қарайтын қоғамда адамдар ынтымақта бірге жұмыс істеп, тату өмір сүреді. Қазіргі таңда мемлекет деңгейінде де діни келісімге ерекше мән берілген.
Пайғамбарымыздың (с.а.у.) хадисінде: «Мұсылман – дос бола алатын және басқалар да онымен достасатын адам. Ал, адам баласымен бауыр бола алмайтын және өзгелер онымен достық құра алмайтын кісіде ешбір жақсылық жоқ», деген.
Демек, діни тұрақтылық – қоғамдағы бейбітшілік, өзара құрмет пен тұрақты даму үшін өте маңызды.
Икрам АЙТАЕВ
