Қай халықтың болсын болашағы оның өткен тарихымен, салт-дәстүрімен және рухани құндылықтарымен тығыз байланысты. Дәстүр – ұлттың жадында сақталған өмір сүру қағидаларының, дүниетанымының және мәдени болмысының көрінісі. Сондықтан да тамыры терең дәстүр – елдік сананың, ұлттық тұтастықтың берік негізі.
Қазақ халқы ғасырлар бойы қалыптасқан бай салт-дәстүрге ие. Қонақжайлық, үлкенге құрмет, кішіге ізет, ата-ананы қадірлеу, ынтымақ пен бірлік – ұлтымыздың басты құндылықтары. Бұл дәстүрлер тек тұрмыстық әдет-ғұрып қана емес, ұлттың мінезін, адамгершілік келбетін айқындайтын рухани бағдаршам іспетті. Осындай құндылықтар арқылы жас ұрпақ бойына отансүйгіштік, жауапкершілік және елге қызмет ету сезімі сіңіріледі.
Елдік сана – бұл тек мемлекеттік рәміздерді құрметтеу немесе тарихты білу ғана емес. Ол – халықтың ортақ құндылықтарын түсіну, ұлттық мүддені жеке мүддеден жоғары қою, туған жерге адал болу. Мұндай сана ең алдымен отбасыдан, ұлттық тәрбие мен дәстүрден бастау алады. Бесік жыры, тұсаукесер, сүндет той, бата беру секілді салттар ұрпақ сабақтастығын сақтаудың айқын үлгісі.
Қазіргі жаһандану дәуірінде ұлттық болмысты сақтау мәселесі ерекше маңызға ие. Ақпараттық кеңістіктің кеңеюі, батыстық мәдени ықпал дәстүрлі құндылықтарға сын-тегеурін тудыруда. Осындай кезеңде ұлттық дәстүрді жаңғырту, оны заман талабына сай дәріптеу – елдік сананы нығайтудың маңызды тетігі.
Дәстүр мен жаңашылдықты үйлестіре білу – ұлттың өміршеңдігінің кепілі.
Қорытындылай келе, тамыры терең дәстүр – халықтың рухани тірегі, елдік сананың қайнар көзі. Ұлттық құндылықтарын қадірлеген, дәстүрін ұлықтаған ел ғана болашағына нық қадам басады. Сондықтан әрбір азаматтың міндеті – ата-бабадан аманат болып қалған асыл дәстүрді сақтап, оны келер ұрпаққа лайықты түрде жеткізу.
С.ТАНЫСБАЕВ,
Оңалту жұмыстарын ұйымдастыру
бөлімінің басшысы
