Қазақстан мұсылмандары діни басқармасының Төрағасы, Бас мүфти Наурызбай қажы Тағанұлының бағдарламалық баяндамасы және жуырда ашылған «Дәстүр және отбасы» бағыты аясында Шымкент қаласы, Абай ауданындағы Кенесары хан мешітінде «Жасөспірімдерге кеңес беру орталығы» ашылды.
Игі жобаны Шымкент қаласы, Абай ауданының бас имамы, магистр Мұхамеджан Естеміров жан-жақты ұйымдастырып, жүзеге асырды. Жаңа орталықтың ашылу рәсіміне қалалық Шариғат және пәтуа бөлімі, Жастар ісі секторы, «Дәстүр және отбасы» бағытының өкілдері және бірқатар азаматтар қатысты.
Аталмыш орталықтың негізгі мақсаты – жасөспірімдерге ұлттық салт-дәстүр негізінде тәлім-тәрбие беру, рухани күйзеліске ұшыраған жастарға қолдау көрсету, сондай-ақ нашақорлық, лудомания, ішімдік ішу секілді теріс әрекеттерден және жат ағымдардың ықпалынан сақтандыру. Орталық арнайы жиһазбен жабдықталып, қажетті оқулықтармен қамтамасыз етілген, – деді Мұхамеджан Естеміров.
Өз кезегінде Шымкент қаласының бас имамы Бақдәулет Нұрматұлы бұл кеңес беру орталығының жұмысын дамыту мақсатында түрлі сала мамандары шақырылып, семинарлар, басқосулар және дәрістер ұйымдастырылатынын атап өтті.
Айта кетейік, орталықтың қысқа уақыттағы жұмысы нәтижесінде 13 жасөспірімге кеңес беріліп, олардың өмірлік бағыттары оң арнаға өзгерген.
