Қостанай облыстық «Аймағанбет қажы Спанұлы» мешітіне ұстаздық қызметке келген Мұртаза қари Ертайұлы аз уақыт ішінде өңірдің діни білім беру саласында нәтижелі еңбек етіп келеді. Бұған дейін ол елордадағы Астана Бас мешіті мешітінде тәлімгерлік қызмет атқарған. Сонымен қатар Қазақстан мұсылмандары діни басқармасы ұйымдастыратын республикалық Құран жарыстарында әділқазылар алқасының мүшесі.
Ұстаз қызметке кіріскен тоғыз айдың ішінде облыс тарихында тұңғыш рет қари дайындады. Негізгі оқу мерзімі үш жылды құрайтынын ескерсек, бұл – қысқа уақыттағы маңызды жетістік.
Қаридың шәкірті – 15 жастағы Ералы Алматұлы Ибраев Құран-Кәрімнің 30-парасын толық жаттап шықты. Ол діни біліммен қатар спорт саласында да жетістіктерге жетіп, еркін күрестен облыс жеңімпазы атанып, джиу-джитсудан Азия чемпионатында қола жүлдеге ие болған.
Жуырда облыстың бас имамы Бектұрсын Торғайбайұлы аталған мешітте жас қаридың медресе оқуын тәмамдағанын растайтын сертификатты салтанатты түрде табыстады. Сондай-ақ жамағат атынан Ұмра сапарына жолдама берілді.
Алдағы уақытта Ералы Алматұлы республикалық Құран жарыстарына қатысып, өңір намысын қорғайды. Сонымен қатар қасиетті Рамазан айында тарауық намаздарында Құран хатым түсіру жоспарлануда.
Айта кетейік, Қостанай ауданына қарасты Алтынсарин ауылында демеушілердің қолдауымен медресе құрылысы жүргізілуде. Болашақта аталған оқу ордасында Құран жаттау ісі жүйелі жолға қойылып, қарилар қатары артады деп күтілуде.
