Сұрақ: Өмірден өткен ата-бабаларымызға қандай Құран сүрелерін оқығанымыз дұрыс?
Жауап: Халқымыз өмірден өткен кісілерге «марқұм» деген сөзді қолданады. Оларға Құран бағыштау – шариғат құптаған, сауапты іс. Құранның кез келген аят-сүресін оқуға болады. Сондай-ақ, Құранның барлық сүрелерін оқып, қатым (Құранды толық оқу) етуге де болады.
Мұсылмандар арасында жиі оқылатын сүрелер мен аяттар бар. Олар: «Фатиха», «Бақара», «Аятул-Курси», «Ясин», «Мүлік», «Ықылас», «Фалақ», «Нас» сүрелері. Бұл сүрелер оқылғанда өмірден өткен кісілерге сауабы тиетіні жайлы хадисте баяндалған.
Атап айтқанда, пайғамбарымыздың (с.а.у.) хадисінде: «Өлгендеріңе «Ясин» сүресін оқыңдар» десе, тағы бір хадисінде: «Сендерден біреу қайтыс болғанда, оны көп күттірместен қабірге қоюға асығыңдар. Жерленген соң, біреуіңіз басында тұрып, «Фатиха» сүресін, аяқ жағында тұрып «Бақара» сүресінің соңғы (әмәнарасулу) бөлігін оқысын», деген.
Ал ел ішінде марқұмдарға «Құран бағыштауға болмайды» деп жүргендер – дін негіздерін білмейтін, әсіре діншілдер санатынан. Мұндай адасушылықтан Алла сақтасын.
Икрам АЙТАЕВ
