Сұрақ: Исламға мәжбүрлеп кіргізуге бола ма?
Жауап: Ислам – халықтың рухани өмірінен орын тапқан дәстүрлі бейбіт дін. Оған тарих күә. Ислам тағылымы еш уақытта зорлау, қинау, қорқыту, қару кезену әрекеттерін қолдамайды. Өйткені Исламның жолына хикметпен, даналықпен, жұмсақ тілмен, көркем уағызбен шақыру – діннің қағидаларынан.
Сондай-ақ, Исламда ешбір пендені зорлап, қорқытып мұсылман етуге рұқсат жоқ. Ал, мәжбүрлеу, қорқыту – дін атын жамылған деструктивті діни ағымдарға тән қасиет. Олардың жұмысы елдің діни тұрақтылығына нұқсан келтіріп, дінараздық алауыздық қоздырып, елдің тыныштығын бұзу ғана.
«Бақара» сүресінің 256-аятында: «Дінде зорлық жоқ…» десе, «Кәһф» сүресінің 29-аятында: «Уа Мұхаммед! Оларға айт: «Раббыларыңнан ақиқат келді. Енді қалаған иман келтірсін, қалаған қарсы келсін» деген.
Демек, Ислам діні мәжбүрлік діні емес, еркіндік діні екендігін аңғаруға болады екен.
Икрам АЙТАЕВ
