Қазақ тарихындағы Құрылтай жиындары қашанда ел ішіндегі айрықша бетбұрыс пен өзгеріске әкелген. Мемлекет басшысы Қасым-Жомарт Тоқаевтың бастамасымен қайта жаңғырған Ұлттық құрылтай отырыстары да сол дәстүрдің заңды жалғасы ретінде түйткілді мәселелердің түйінін тарқатуға түрткі болып келеді. Осы орайда біз бірқатар құрылтай мүшесіне «Бұл басқосу ел өміріне қандай өзгеріс әкеледі?» деген сұрақ қойып, пікірін білген едік.
Аманжол ӘЛТАЙ,
Мәжіліс депутаты:
– Құрылтайдың салмағы сөздің көптігімен емес, іске асырылған нәтижелермен өлшенеді. Осы тұрғыдан алғанда, бұған дейінгі отырыстарда айтылған ұсыныстар негізінде 26 заң қабылданғаны баршаға мәлім. Бұл – қоғамдық талқылаудың құқықтық шешімге айнала алатынын, елдік мәселелердің қағаз жүзінде қалып қоймай, нақты нормаларға айналуға қабілетті екенін көрсететін белгі.
Президент Қызылордаға келіп тұрып, Арал проблемасын айтпай кетуге болмайтынын тілге тиек етіп, су ресурстары мәселесі күн тәртібінде стратегиялық деңгейге көтерілгенін еске салды. Солтүстік Аралды сақтап қалу тәжірибесін жалғастырып, Көкарал бөгетінің деңгейін арттыру жобасын биыл бастау көзделетіні айтылды. Су проблемасы шекарамен шектелмейтінін қаперге алған Мемлекет басшысы су дипломатиясының маңызын атап өтті, ал өңірлік уағдаласу Каспий, Балқаш, Ертіс сияқты жүйелердің болашағына да тікелей әсер ететінін қадап айтты. Сәуір айында Астанада өтетін халықаралық экологиялық саммит осы бағыттағы алдағы қадамдарды нақтылайтын алаң болмақ.
Райымбек БАТАЛОВ,
«Атамекен» ҰКП басқарма төрағасы:
– Президент Абайдың «Толық адам» идеясымен тығыз астасып жатқан «Адал азамат» тұжырымдамасына айрықша мән берді. Бұл – жай ғана абстрактілі пәлсапа емес, адал еңбекті, заңға құрмет пен жауапкершілікті қоғам үшін дамудың басты тетігі ретінде қарастыратын құнды іргетас. Бизнес үшін бұл адалдықты, ашықтық пен жауапкершілікті бәсекелі артықшылық ретінде ұсынатын кәсіпкерліктің жаңа мәдениетіне өтуді білдіреді. Тұрақты экономика мен мемлекет, бизнес, қоғам арасындағы сенімнің негізінде осындай қағидаттар жатыр.
Осы орайда Президенттің бұған дейінгі Құрылтай отырыстарында берген тапсырмаларына сай «Атамекен» ҰКП «адал экономиканы» қалыптастырудың жүйелі жұмыстарын қолға алды. Бұл жерде кәсіпкердің адал ниеті – оның басты артықшылығы, ал салық реформасы ашықтық, тең мүмкіндіктер беру мен жосықсыз тәжірибелерден бас тарту қағидаттарымен қатар жүреді.
Президент кәсіпкерлер мен азаматтардың диалогі мен пікірін есепке алатын «жанжалсыз фискалдық транзит» пәлсапасын алға тартқаны белгілі. Бұл тұрғыда «Атамекен» ҰКП кодексті дайындауға белсенді түрде қатысты әрі қазір де туындаған мәселелерді мемлекеттік органдармен бірге талқылап келеді. Соның арқасында салықтық әкімшілендірудің сервистік моделін енгізіп, есептілікті қысқартуға қол жеткізілді. Біз үшін салық саясаты бизнестің дамуына түрткі болумен қатар, ағымдағы экономикалық жағдайға сәйкес болғаны маңызды. Сондықтан мүдделер теңдігі мен фискалдық жүйенің тұрақтылығын қамтамасыз ету мақсатында мемлекеттік органдармен, кәсіпкерлермен жұмысты жалғастыра береміз.
Нұрлыбек ӘЛМАҒАМБЕТОВ,
Қостанай облысы Амангелді аудандық мәслихатының төрағасы:
– Қызылорда қаласында Мемлекет басшысы Қасым-Жомарт Тоқаевтың төрағалығымен өткен Ұлттық құрылтайда халық қамы, мемлекет мүддесі тұрғысында көптеген келелі мәселе көтерілді. Жылдар өткен сайын тәуелсіздігіміздің тұғырлы болып, ел экономикасының дамып жатқанын көріп отырмыз. Халықтың тұрмыс-тіршілігінің жақсарғанын, шетелдерге барып жүргенімізде салыстыра отырып бағалайсың. Бұның бәрі – мемлекеттік саясаттың дұрыс жолға қойылып отырғанының дәлелі.
Қызылорда құрылтайында Президент: «Кез келген жағдайда патриотизмді нығайтуға тырысу қажет және мемлекеттік символиканы – туымызды, елтаңбамызды, көліктерде, үйлерде, көшелерде және елімізде немесе шетелде өтетін спорттық және басқа да іс-шараларда дұрыс пайдалану маңызды», деді. Президентіміздің бұл сөзі әрбір азаматтың ойында болып, көк туымыздың ашық аспанда мәңгі желбіреп тұруы үшін әрқайсымыз тәуелсіз еліміздің лайықты азаматы бола білейік, адал еңбек етейік дегім келеді.
Дайындаған –
Ескендір ЗҰЛҚАРНАЙ
