Мұсылман күнтізбесінде «үш ай» (арабша – «әшһурул-хұрым») деген ерекше ұғым бар. Бұл – пенденің Жаратушыға жақындап, жүрегін тазартып, мол сауапқа кенелетін Ережеп, Шағбан және Рамазан айлары.
Ардақты Пайғамбарымыз (с.ғ.с.) бұл айлар кіргенде былай деп дұға ететін болған: «Уа, Алла! Ережеп пен Шағбан айларын бізге қайырлы әрі берекелі ет! Бізді Рамазан айына аман-есен жеткіз!»
Осы үш айды рухани диқаншылыққа теңеуге болады: Ережепте дән егіледі, Шағбанда суарылып күтіледі, ал Рамазанда егіннің жемісі, яғни мол сауап жиналады.
- Ережеп – Алланың айы (Дән егу маусымы)
Алла Тағаланың ерекше рақымы төгілетін айы, қасиетті айлардың алғашқысы – Ережеп. Биылғы жыл есебі бойынша Ережеп айы аяқталды (2025 жылдың желтоқсанында кірді). Бұл сөз «ұлықтау», «құрметтеу» деген мағынаны береді. Бұл ай – тәубеге келудің, жаман әдеттерден арылып, игілікке бет бұрудың бастауы. Ережепте жасалған зұлымдық пен күнәнің жазасы ауыр, ал игі істердің сауабы мол болады.
Ережеп айының ерекшеліктері:
- Рағайыб түні: Ережеп айының алғашқы жұма түні. Бұл түн – Алланың рақымы төгіліп, дұғалар қабыл болатын сәт.
- Миғраж түні: Пайғамбарымыздың (с.ғ.с.) көкке көтеріліп, бес уақыт намаз парыз етілген қасиетті түн. Бұл оқиға мұсылманның Аллаға намаз арқылы жақындайтынын еске салады.
Бұл айда нәпіл ораза ұстап, садақа беріп, кешірім тілеу (истиғфар) арқылы жүректі Рамазанға дайындау керек.
- Шағбан – Пайғамбарымыздың айы (Суару маусымы)
Ережеп пен Рамазанның арасындағы көпір іспеттес Шағбан айы бүгін басталды. Көптеген адамдар бұл айдың қадірін біле бермейді, алайда Пайғамбарымыз (с.ғ.с.) Шағбан айында көп ораза ұстаған.
Шағбан айының інжу-маржаны – Бәрат түні (2 ақпаннан 3 ақпанға қараған түн). Бұл түн «құтылу», «арылу» деген мағынаны білдіреді. Сенім бойынша, дәл осы түні алдағы бір жылдық тағдыр, ризық-несібе жазылады және Алла Тағала шынайы тәубе еткен құлдарын кешіреді.
Шағбан айындағы ең маңызды амал – Рамазанға нақты жоспар құру, Құран оқуды жиілету және салауат айту. Еккен дәніміз қурап қалмауы үшін оны осы айда ізгі амалдармен суаруымыз қажет.
- Рамазан – Үмметтің айы (Орақ ору маусымы)
Рамазан – он бір айдың сұлтаны, Құран түскен ай және мың айдан да қайырлы Қадір түні бар ұлы маусым. Биыл қасиетті ораза 19 ақпан күні басталады. Бұл – сабырлылық мектебі және рухани тазарудың шыңы. Қадір түні (16 наурыздан 17 наурызға қараған түн) – Құран Кәрім түсе бастаған түн. Бұл түнде жасалған ғибадат 83 жылдық (1000 ай) құлшылыққа тең.
Рамазанның нығметтері:
- Парыз ораза: Нәпсіні тәрбиелеп, шыдамдылыққа үйретеді.
- Құран хатым: Алланың сөзін оқып, оған амал ету.
- Тарауих намазы: Мешіттерде жамағатпен оқылатын түнгі құлшылық.
- Пітір садақа: Мұқтаждарға көмектесу арқылы бауырмалдықты арттыру.
Рамазан – Ережепте еккен, Шағбанда күткен рухани егіннің жемісін жинайтын уақыт. Бұл айда жасалған әрбір жақсылықтың сауабы еселеніп жазылады.
Қасиетті үш ай – бізге берілген алтын мүмкіндік. Өмірдің қарбаласымен жүріп, рухани азығымызды ұмытпайық. Бұл күндерді бос өткізбей, Жаратқанға жақындауға тырысайық.
Ниеттеріңіз қабыл, амалдарыңыз сауапты болсын!
Гүлбиназ ҒЫЙСАҚЫЗЫ,
«Діндерді зерттеу орталығы»
