Қарағанды облысы, Шет ауданына қарасты Батық ауылында «Ахмет» мешітінің ашылу рәсімі өтті.
Игі шараға ҚМДБ-ның Қарағанды облысы бойынша бас имамы Естай Айтуғанұлы, аймақтың құрметті азаматтары, ауыл ақсақалдары мен жергілікті тұрғындар қатысты.
Құлшылық ордасының ашылу рәсімінде облыс бас имамы Естай Айтуғанұлы арнайы сөз сөйлеп:
_«Аллаға шүкір, Қарағанды облысында мешіттеріміздің қатары артып келеді. Осы мешіттің бой көтеруіне атсалысқан, ұйытқы болған барша арда азаматтарға Алла разы болсын! Кәсіптеріңізге береке, отбасыларыңызға амандық тілеймін»,_ – деді.
Сондай-ақ, мешіттің құрылыс жұмыстарының басы-қасында болып, игі іске белсене атсалысқан Азамат Қуатұлы мен Алмас Несіпбайұлына ҚМДБ Төрағасы, Бас мүфти Наурызбай қажы Тағанұлы Хазіреттің атынан алғыс хат табысталды.
Бұдан бөлек, мешіттің салынуына демеушілік жасаған жеті азаматқа Қарағанды облысының бас имамы Естай Айтуғанұлының атынан алғыс хаттар берілді.
Жаңа мешіттің ашылу рәсімінде Қарағанды облысы өкілдігінің атынан «Мүфтият» баспасынан жарық көрген 100 дана кітап сыйға тартылды.
Айта кетейік, Батық ауылында бой көтерген жаңа мешітте бір мезетте 60 адамға дейін еркін ғибадат етуге мүмкіндік бар. Құлшылық үйінде ерлерге арналған намазхана, дәретхана, имам бөлмесі және Құран оқу бөлмесі қарастырылған.
ҚМДБ-ның Қарағанды облысы бойынша өкілдігінің баспасөз қызметі
