Сұрақ: Исламда Отан туралы түсінік бар ма?
Жауап: Исламда отан, жер, ұлт деген түсінік бар. Бұл түсінік халықтың сансында дұрыс орын тапқан. Кейбір радикалды діни топтар халифат құрамыз, ислам мемлекетін құрамыз, дінде отан, мемлекет ұғымы жоқ деген уәжімен адамдарды адастырып, санасын улап, елдің діни тұрақтылығына сызат түсіруде. Олардың армандағаны – елде тұрақтылықты жойып, дінараздық алауыздық қоздыру.
Мұндай радикалды көзқарастар исламның қағидасына жат. Ислам діні көп ұлттар мен ұлыстарды түрі мен нәсіліне қарамай бір шаңырақ астына біріктірген бейбіт дін. Ал, дәстүрлі дінде орын алған мәселенің бірі – Отан және отанды қорғау мәселесі. «Отанды сүю – иманнан», «Екі көз тозақ отына күймейді: бірі – оңашада күнәларына өкініп жылаған көз; екіншісі – шекара күзеткен көз» деген.
Мұхаммед (с.а.у.) пайғамбарымыздың тағылымды хадистерінен отансүйгіштіктің шынайы мұсылманға тән қасиет екендігін аңғаруға болады. Шариғат бойынша туған жерін, Отанын қорғау жолында қаза тапқандар шейіт болып саналады. Демек, Отан ұғымы Исламда қамтылып, оған сүйіспеншілікпен қарау керектігі айтылған екен.
Икрам АЙТАЕВ
