Уақып дегеніміз – мұсылман адамның артынан жалғасатын сауапты амал екені баршамызға мәлім. Уақыптың ең алғашқы күндерінен бастап дамыған түрі – аурухана салу.
Бұл амал – уақыптың қайырымдылық түріне жатады. Кезінде Мысыр елінде оқып жүргенде, мешіттердің ішінде дәрі-дәрмектер тұрған жәшіктерді көретін едік. Сұрап көрсек, қандай да бір мұсылман адам ауырып, жазылған соң, қажеттілігінен артылған, мерзімі өтпеген дәрілерін сауап ниетімен басқа мұсылман бауырына беру ниетімен осы жәшікке қояды екен.
Мешітке тегін ем жасауға келген дәрігер науқастарды тексеріп, дәрілерді қарап, науқастарға беретін.
Мәселен, мысырлық Мұхаммед Мешали деген дәрігер елу жыл бойы тегін немесе өте аз ақыға адамдарға ем жасапты.
Пайғамбарымыз (Алланың салауаты мен сәлемі оған болсын): «Адамдардың жақсысы (өзге) адамдар үшін көбірек пайда тигізгендері», – деген. (Табарани)
Сондықтан, атам қазақ: «Жақсыдан шарапат» деп айтпақшы, әрбір адам қолынан келгенше қиналғанға көмек жасағаны абзал.
Алла баршамызға сауапты амалды көп жасауға жазсын!
Қуат ҚАБДОЛДА
