Бүгін Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы Мысыр Араб Республикасында «Заманауи сын-қатерлер жағдайында пәтуа беру және адам болмысының тұтастығы» тақырыбындағы II халықаралық пәтуа форумында баяндама жасады.
Халықаралық деңгейдегі мәртебелі жиын Мысыр Президенті Абдул Фаттах ас-Сиси мырзаның қамқорлығымен ұйымдастырылып, әлемнің әр түкпірінен жетекші ғалымдар, Бас мүфтилер мен діни сарапшылар қатысуда.
Форумда баяндама жасаған Бас мүфти Наурызбай қажы Тағанұлы заманауи сын-қатерлер жағдайында пәтуа беру жауапкершілігінің арта түскенін, цифрлық кеңістіктің кеңеюі мен ақпарат ағынының жылдамдығы діни үкімдердің үстірт әрі бейберекет таратылуына жол ашып отырғандығын атап өтті. Осы тұрғыда пәтуаның тек білікті ғалымдар мен беделді ғылыми орталықтар арқылы берілуі аса маңызды екенін жеткізді.
Сондай-ақ ҚМДБ Төрағасы Қазақстан мұсылмандары діни басқармасының пәтуа жүйесін жетілдіру бағытында атқарып жатқан жұмыстарына тоқталды. Атап айтқанда, елімізде Ғұламалар кеңесі арқылы көпсатылы ғылыми сараптама жүргізілетіні, имамдардың біліктілігін арттыру бағдарламалары ұдайы жүзеге асырылып жатқанын жеткізді.
