Елордадағы Республикалық бас мешітте Астана қаласы дін қызметкерлерінің кезекті республикалық аттестаттауы өтті.
Аттестаттау шарасына Қазақстан мұсылмандары діни басқармасы Төрағасының орынбасары, наиб мүфти, комиссия төрағасы Кенжетай Байкемелұлы қатысып, имамдарға Бас мүфти Наурызбай қажы Тағанұлының сәлемін жеткізді. Сондай-ақ аттестаттаудың дін қызметкерлерінің білімін жетілдіру мен кәсіби жауапкершілігін арттырудағы маңызына тоқталды.
Комиссия құрамында Бас мүфти кеңесшісі Смайыл Сүйерқұлұлы, Діни білім және кадр дайындау бөлімінің меңгерушісі Хасан Аманқұлов, Дін істері және талдау бөлімінің меңгерушісі Асан Тілеубердиев, сондай-ақ Шариғат және пәтуа бөлімінің маманы Медет Құрсақов болды.
Аттестаттау барысында дін қызметкерлері алдымен компьютерлік тест арқылы ақида, фиқһ, Ислам тарихы және қолданыстағы заңнама бойынша білімдерін сынады. Бұдан кейін сұхбаттасу кезеңінде қырағат, тәжуид, хадис, дін мен дәстүр және ҚМДБ-ның концептуалды құжаттары бойынша сұрақтарға жауап берді.
Айта кетейік, аттестаттау А, В және С санаттары бойынша өткізілді. Жалпы аталған емтиханға Астана қаласынан 109 дін қызметкері қатысты.
