Қарағанды облыстық №2 көпсалалы ауруханасында өңір медицинасы тарихындағы айтулы оқиға болды. Мұнда алғаш рет электродсыз кардиостимуляторды имплантациялау операциясы сәтті өтті. Бұл – жүрек ырғағының ауыр бұзылыстарын емдеудегі жаңа буын технологиясы, науқастардың өмір сапасын жақсартуға бағытталған заманауи шешім.
Электродсыз кардиостимулятордың басты ерекшелігі – оның жүрек қуысындағы тінге тікелей енгізілуі. Операция кезінде құрылғы жамбас қантамырлары арқылы жеткізіледі. Енді ертеректегідей электродтарды тарту немесе тері астына арнайы «қалта» жасаудың қажеті жоқ. Озық тәсіл асқыну қаупін азайтып, науқастың тез оңалуына мүмкіндік береді.
Аурухананың аритмолог-хирургі Нұрлан Елемесовтің айтуынша, жаңа құрылғының көлемі небәрі екі сантиметр ғана, ол жүректің оң жақ қарыншасына орнатылады.
– Құрылғы жүрек өткізгіштігін қалпына келтіріп, қалыпты ырғақты сақтауға көмектеседі. Операциядан кейінгі келесі күні-ақ науқас өздігінен жүріп-тұра алады. Бұл бұрынғы әдістерге қарағанда әлдеқайда тиімді әрі қауіпсіз тәсіл, – дейді дәрігер.
Облыста жыл сайын 200-ден астам науқасқа кардиостимулятор орнатылады екен. Қарағанды дәрігерлері алғаш рет электродсыз құрылғы арқылы жасаған операция әрі қарай да жалғасып, науқастардың оңалып кетуіне септігін тигізе береді. Операция еліміздің жетекші аритмологтерінің қатысуымен, сондай-ақ БАӘ мен АҚШ-тан шақырылған мамандардың, «Abbott» компаниясының клиникалық серіктестерімен бірлесе атқарылды.
– Мұндай құрылғы 20–25 жылға дейін қызмет ете алады. Әрине, бұл мерзім оның иесінің өмір салтына да байланысты. Қажет болған жағдайда құрылғыны жаңасына ауыстыру мүмкіндігі бар. Қарағанды дәрігерлерінің кәсібилігі жоғары деңгейде, барлық қажетті құрал-жабдық дер кезінде дайын болды, – дейді «Abbott» компаниясының клиникалық маманы Хадер Абу Халаф.
Денсаулық сақтау министрлігінің штаттан тыс бас аритмологі, Қазақ аритмологтер қоғамының президенті Аян Абдрахманов жаңа технологияның еліміздің бірнеше қаласында енгізіліп жатқанын атап өтті.
– Электродсыз кардиостимулятор – әлемдік медицинадағы ең жаңа жетістіктердің бірі. Қазірде мұндай операциялар Астана, Алматы, Ақтау, Семей, Шымкент қаласында жасалып келеді. Енді осы қатарға Қарағанды да қосылды. Бұл әдіс бұрынғы үлгідегі кардиостимуляторлармен салыстырғанда анағұрлым тиімді. Ол теріасты қалталарына, электродтарға байланысты асқынулардың алдын алып, науқастардың өмір сапасын жақсартады. Ең бастысы – бұл технология елдегі барлық тұрғынға қолжетімді болуға тиіс, – деді ол.
Жаңа әдіспен операция жасалған алғашқы науқастардың бірі – Қарағанды қаласының тұрғыны Евгения Бондаренко. Ол операциядан кейінгі жағдайы туралы айтып, медицина қызметкерлеріне ризашылығын білдірді.
– Бастапқыда уайым болғаны рас, бірақ дәрігерлердің шеберлігінің арқасында бәрі жақсы өтті. Қазір өзімді жеңіл әрі жақсы сезінемін. Дәрігерлер мен медбикелерге үлкен алғыс айтамын, – деді ем алушы.
Кейінгі жылдары Қарағанды өңірінде денсаулық сақтау саласы инфрақұрылымдары жаңартылып, медицина мекемелері цифрландырылып, жоғары технологиялы құрал-жабдықтар орнатылып, кадрлық әлеует артып келеді. Медицинаның даму қарқынына байланысты облыста телемедицина, цифрлық шешімдер, автоматтандырылған тіркеу, электронды денсаулық паспорты сияқты жаңашыл жоба жүзеге асырылып жатыр. Мұның барлығы сапалы, қолжетімді медициналық қызмет көрсетуге жол ашты.
Қарағанды дәрігерлерінің жетістігі – өңір медицинасының ғана емес, жалпы еліміздегі денсаулық сақтау жүйесінің қарышты қадамы. Электродсыз кардиостимуляторды орнату операциясы елімізде жоғары технологиялы медициналық көмектің жаңа кезеңін бастап берді. Бұл жаңалық – отандық медицинаның мүмкіндігі артқанын, білікті мамандар мен заманауи технологиялардың адам өмірін сақтауда шешуші рөл атқаратынын тағы бір мәрте дәлелдеді.
Қасымхан ҒАЛЫМ
Қарағанды облысы
