Қазақстан мұсылмандары діни басқармасының төрағасы, Бас мүфти Наурызбай қажы Тағанұлы жыл басында жариялаған бағдарлық баяндамасында 2025 жылды «Ислам және отбасы құндылығы» жылы деп атап өткен болатын. Осыған сәйкес, Жетісу облыстық өкілдігі аталған жыл аясында бірқатар маңызды шараларды жүзеге асырып, жылдық жұмыс қорытындысын шығарды.
Жетісу облысының бас имамы Керімбек Сәрсембайұлы өкілдікке қарасты 8 аудан мен 2 қала имамдарының жыл бойы атқарған жұмыстары туралы есебін тыңдады. Жиын қасиетті Құран аяттарын оқумен басталды.
Баяндамалар барысында аудан имамдары мешіттердің жылдық қызметін жан-жақты таныстырып, орындалған жұмыстардың деңгейін слайд арқылы көрсетті. Әр имам мүфтият бекіткен 4 бағыт бойынша жүзеге асқан іс-шараларды баяндап, жоспардың орындалу нәтижелерін жеткізді.
Сонымен қатар, Жетісу облыстық «Иман» орталық мешітіндегі бағыттарға жауапты наиб имамдар 8 аудан мен 2 қаланың жұмысына талдау жасап, көрсеткіштерді салыстырмалы түрде ұсынды. Жиында анықталған кемшіліктер мен оларды жоюға қатысты ұсыныстар да айтылды.
Жиын соңында жыл бойы белсенділік танытып, республикалық деңгейдегі айтулы шараларда – соның ішінде Құран жарыстарында – қызмет еткен имамдарға арнайы алғыс білдірілді.
