Сұрақ: Жаман ойда болу күнә ма?
Жауап: «Әр адамның басында бір қиял» демекші, адамның ойына жақсы да, жаман да ой келетіні белгілі. Адамның жақсы ойға барып, дұрыс ойлап амал етуі – шариғат құптаған амал. Ал орынсыз жаманға ойға бару, өз пайымымен жорамалдап адамның атақ-абыройына, беделіне нұқсан келтіру, өсек-ғайбатқа бой алдыру – дінде құпталмаған іс.
Ислам дінінде жаман ойда болу, біреудің айыбын іздеу, ғайбаттау, сөз тасу күнә. Барынша жағымсыз ойлардан аулақ болып, жақсылыққа ұмтылғанымыз қайырлы амал. Жаман ойлардың салдарын ескере, Құран аяттары мен хадистерде сақтануға шақырған.
«Хужурат» сүресінің 12-аятында: «Уа, иман келтіргендер! Ойдың (күмәннің) көбінен сақтаныңдар. Өйткені ойдың кейбірі – күнә. Бір-бірлеріңнің кемшіліктеріңді іздемеңдер. Ешкім ешкімнің артынан шағыстырмасын…» десе, Пайғамбарымыздың (с.а.у) хадисінде: «Жақсы ойда болу жақсы құлшылыққа жатады» деген.
Демек, жақсы ойда болып, жақсылыққа ұмтылу, жақсылықтың нышаны екен.
Икрам АЙТАЕВ
