Сұрақ: Сәбиі қайтқан адамға қалай көңіл айту керек?
Жауап: Қазақ халқының дәстүрінде қайғылы үй иелеріне көңіл айту салты қалыптасқан. Көңіл айтудың өзіндік орындары мен тәртібі бар. Қуанышта да, қайғыда да орынды сөз айта білу қажет. Орынсыз сөздерді қолданып, көңіліне ауыр тиетін жағдайлардан сақ болғанымыз дұрыс.
Көңіл айту – үлкен іззетіліктің, адамгершіліктің, азаматтылықтың, парасаттылықтың белгісі. Адам сәбиінен, жақындарынан айырылуы мүмкін. Бұл Алланың тағдыры. Сәбиі қайтыс болған үйге қайғысына ортақтасып, «шапағатшы болсын», «арты қайрлы болсын, қалғанына өмір берсін» деген мазмұндағы т.б сөздерді қолдануға болады.
Дәстүрлі Исламда әрбір мұсылман орындауға тиіс игі амалдар бар. Бұл жайлы хадистерде кең баяндалған. Пайғамбарымыз (с.а.у.) хадисінде: «Мұсылманның мұсылманға бес ақысы бар: сәлем қайтару, ауырған адамды зиярат ету, жаназаларға қатысу, шақыруға жауап беру және түшкірушіге дұға (ярхамукуалла деп) айту» деген.
Демек, мұсылманның мұсылманда бірнеше ақылары бар екенін ұмытпағанымыз жөн екен.
Икрам АЙТАЕВ
