Баршаңызды мерейлі мерекелеріңіз – ұстаздар күнімен шын жүректен құттықтаймын! Деніңізге саулық, отбасыңызға амандық, ұрпақ тәрбиесіндегі ұлағатты істеріңізге береке тілеймін!
Адам баласының ойлау жүйесі қалыптаса бастаған сәтте әр нәрсені танып-білуге талпынады. Білім адам кеудесіне өздігінен қонбайды. Ата-ананың тәрбиесі, ұстаздың үйретуі, ізгі достардың көмегі арқылы баланың білім көкжиегі кеңейіп, дүние-танымы арта бастайды.
Ардақты Пайғамбарымыз Мұхаммед (оған Алланың салауаты мен сәлемі болсын) бір хадисінде: «Ілім үйреніңіздер, ілімге қажетті байыптылық пен байсалдылықты да қоса үйреніңіздер. Сіздерге ілім үйреткен кісіні құрметтеңіздер, сыйлаңыздар», – деген.
«Адамның адамшылығы ұстаздан» деп Хәкім Абай айтқандай, бойына парасаттылық пен байсалдылық, даналық пен көркем мінез қалыптастыра білген немесе өз саласында белгілі бір жетістікке жеткен кез келген тұлға ұстаз тәрбиесін алып, тәжірибе жинайды. Өмірдің осы бір ғибратты сәттері әркез жалғаса бермек. Өйткені, ұстаздық ету – өз уақытыңды аямау. Аллаға ұнамды істердің барлығына мол сауап жазылады. Солардың ішінде адам тәрбиелеудің маңызы үлкен. Тәрбие ісі – абыройлы жұмыс.
Көп жағдайда садақа ұғымын біреуге қаржылай көмектесу, оған қайырымдылық жасау деп түсініп, осындай оймен шектеліп жатамыз. Садақа сөзінің мағынасы терең, ұғымы кең. Садақаның ең абзалы – ұстаздық ету. Алла елшісі (оған Алланың салауаты мен сәлемі болсын): «Садақаның ең жақсысы – ілім үйреніп, оны басқаларға үйрету»деген. Алланың бізге берген қабілетін ілім үйретіп, шәкірт тәрбиелеуге жұмсағанымыз – садақа жасағанымыз.
Артына ілім қалдырған адам үшін шәкірті әрдайым дұға жасап, жақсылық тілеп жүреді. Сондай азаматтардың қатары көбейсін деп тілейміз. Алла Тағала барша ұстаздарға жар болып, ізгі амалдарының сауабын еселеп жазғай. Әмин!
Наурызбай қажы Тағанұлы,
ҚМДБ төрағасы, Бас мүфти
