Қоғамның тұрақтылығы мен елдің болашағы ең алдымен адамның рухани дүниесі мен санасының тазалығына байланысты. Сау сана – мемлекеттің мызғымас іргетасы, ал ол әлсіреген жағдайда қоғамда алауыздық пен тұрақсыздықтың өршуі заңдылық. Бүгінгі таңда деструктивті діни ағымдардың таралу қаупі әлемдік деңгейде өзекті болып отыр. Бұл ағымдар жеке тұлғаның санасын улап қана қоймай, тұтас ұлттың дамуына, мемлекеттің қауіпсіздігіне қауіп төндіреді. Сондықтан сана саулығын сақтау мәселесі – тек жеке адамның емес, бүкіл қоғамның ортақ мүддесі.
Діннің түпкі миссиясы – адамды мейірімге, бауырмалдыққа, татулыққа шақыру. Әлемнің барлық дәстүрлі діндерінің ортақ үндеуі – ізгілік пен тыныштық. Дін адамзатқа өмірдің мәнін түсіндіріп, қоғамды адамгершілікке баулу үшін берілген. Алайда тарих тәжірибесі көрсеткендей, дін өзінің рухани болмысынан ажырап, саяси мақсаттарға қызмет еткен тұста қауіпті сипатқа ие болады. Саясиланған дін өзінің көркемдігін жоғалтып, адамдардың жүрегіндегі сенімнен гөрі билікке ұмтылған топтардың құралына айналады. Мұның соңы радикалдық идеяларға жол ашып, қоғамды қақтығыс пен алауыздыққа жетелейді.
Радикалды ағымдардың басты қаупі – олар дінді шектен тыс догмаға айналдырады. Бұл жағдайда ғылым мен білімнің дамуына тосқауыл қойылады, жастар сыни ойлау қабілетінен айырылады, ал қоғам өз мүмкіндігінен айырылып, қараңғылыққа бой алдырады. Догма үстем болған жерде өркениет тоқтап, прогресс құндылығы құлдырайды. Осы себепті дәстүрлі діннің іргелі қағидаттарын бұрмалап, оны саяси қаруға айналдыру мемлекет үшін ең қауіпті қатерлердің бірі саналады.
Қазақ халқының тарихына үңілсек, ата-бабамыз ешқашан дінді алауыздық құралы етпей, керісінше, ұлттық дәстүрмен үйлестіріп, оны имандылық пен адамгершілік мектебі ретінде қабылдады. Ислам діні халқымыздың мәдениетімен біте қайнасып, адамдық қасиетті тәрбиелеудің негізіне айналды. Бұл – біздің рухани иммунитетіміздің басты күші. Бүгінгі күні де осы сабақтастықты сақтау – деструктивті ағымдардың ықпалына қарсы тұратын сенімді тетік.
Қоғам қауіпсіздігі ең алдымен білім мен ғылымға сүйенуге тиіс. Жастардың діни сауатын арттыру, ұлттық құндылықтарды дәріптеу, сыни ойлау қабілетін қалыптастыру – радикалды идеологияға қарсы ең тиімді құрал. Сауатты азамат ешқашан жалған уағыздың жетегінде кетпейді. Осы тұрғыдан алғанда, білім беру мекемелері, бұқаралық ақпарат құралдары және азаматтық қоғам өкілдері мемлекеттің рухани қауіпсіздігін нығайту ісінде үлкен жауапкершілік атқарады.
Сана саулығы – елдің ең қымбат байлығы. Ол бар жерде қоғамда бейбітшілік пен татулық орнайды, ғылым мен білім дамиды, мемлекеттің болашағы жарқын болады. Ал сана уланған ортада тұрақсыздық, радикализм және қараңғылық өршиді. Сол себепті діннің асыл мақсатын дұрыс түсініп, оның саясилануына жол бермеу – әрбіріміздің азаматтық парызымыз. Сау сана – қоғам қауіпсіздігінің кепілі, ал қауіпсіз қоғам – ел дамуының берік тірегі.
Нұрлыхан ҚАЛҚАМАНҰЛЫ,
Теміртау қаласы,
Қарағанды облысы
