Сұрақ: Салт-дәстүрді жоққа шығаратындар кімдер?
Жауап: Қазіргі таңда түрлі сипаттағы ислам атын жамылған діни топтар өздерінің «таза Ислам» ұранымен зайырлылық танымдар мен салт-дәстүрлерді Исламға жат деп адастырып жүр. Сол діни топтарға ерген жастар да баршылық. Діни топтарға еліктеушіліктің себептері дін негіздерін білмеуі, дұрыс дереккөздерге жүгінбеуі, салт-дәстүр мен дін арасындағы айырмашылықтарды түсінбеуі, дінге қатаң, тар түсінікпен қараудан туындайды.
Діни фунтаменталистік түсініктегі діни топты жақтаушылар, салт-дәстүр пайғамбардың (с.а.у.) заманында болмаған «бидғат», яғни исламға жаңалықтар енгізу деген мағынаны алға тартады. Осыған сүйеніп олар ұлттық дәстүрлерді «шариғатқа қайшы» деп қабылдап, жоққа шығарады. Жалған сәлафи сынды діни ағымдар Құран мен хадисті ғана мойындайды, дәстүрлер мен мәдениетті діннен бөлек санайды немесе «адасушылық» деп қарайды. Сондай-ақ, кейбір діни ағым өкілдері араб елдерінің мәдениетін исламның бір бөлігі деп қабылдап, жергілікті дәстүрлерді шеттететіні бар.
Шын мәнінде, салт-дәстүр мен дәстүрлі дін үйлесім таба алады және бұл қазақ халқының тарихында дәлелденіп, рухани өмірінен орын тапқан.
Икрам АЙТАЕВ
