Сұрақ: Өмірден өткендерге арнап Құран оқу, қабірге зиярат ету дінге жат па?
Жауап: Қазіргі қоғамда мәзһаб ұстанбайтын деструктивті діни ағымдар әруақтарға Құран бағыштаған, қабірді, оның ішінде, бір адамның бейітін арнайы барып зиярат еткен адамдарды ширк (серік қосу) жасады деп, ауыр діни үкімдермен айыптап, жек көріп кетеді. Олардың діни пайымында, тіпті пайғамбардың (с.а.у.) қабірін зиярат ету де күнә.
Дәстүрлі Исламның қағидаларын ұстанбайтын діни топтар, тіпті өз туған-туысының қабіріне бармайды, зиярат етпейді. Қорым – олар үшін тыйым салынған, Аллаға серік қосатын жер. Мұндай бұрыс діни көзқарастар кереғар діни ағымдарға тән.
Ал, дәстүрлі дінде шариғат талаптарын сақтаған жағдайда, ас өткізу, марқұмдарға Құран бағыштау, қабірді зиярат етуге рұқсат етілген. Негізгі құлшылық тек Алла Тағалаға арналуға тиіс. Мұсылман адам үшін Құран бағыштау, қабірді зиярат ету парыз, уәжіп емес, бар болғаны тыйым салынбаған қайырлы әрекеттерге жатады.
Қабірді зиярат етуден мақсат қайтыс болған адамның амал кітабына сауап жазылуы үшін Құран бағыштап дұға ету мен бұл дүниенің өткінші және жалған екендігін еске түсіру.
Икрам АЙТАЕВ
