Сұрақ: Намазда «сутра» не үшін қажет?
Жауап: Кейде бес уақыт пен жұма намаздарында адамдар намаз оқып тұрған адамның алдын кесіп өтіп жатады. Мешіттің әдебін білмей, намаз оқып тұрған адамның себепсіз алдын кесіп өту – күнә. Жамағат намазынан бөлек кезде, намаз оқушы кедергі болмайтын, дұрыс жерді таңдап оқығаны абзал. Намаз оқушы алдынан бір адамның кесіп өтуінен қауіптенсе, алдына «сутра» қоюы – мұстахап амал. Намазға кедергі болмау үшін алдына қоятын затты «сутра» дейді.
«Сутра» сөзі бөгет, перде, қалқа деген мағыналарды білдіреді. Оның діни мағынасы намаз орындаушы адамның сәжде жасайтын орынының дәл алдына қойылатын затқа қатысты қолданылады. Ол намаз оқып тұрған адамның алдынан кісі немесе жандардың өтіп кетуіне кедергі жасау үшін қойылады. Бұл жағдай мешітте немесе мешіттің маңындағы ашық жерде, жамағатсыз жеке оқығанда пайдаланады. Сутраға орындық, сөмке, таяқ, т.б. заттар қоюға болады.
Намаз оқып тұрған адамның алдынан ешбір қажеттіліксіз кесіп өтуге тыйым салынған. Пайғамбарымыз (с.а.у.) хадисінде: «Намаз оқушының алдын кесіп өткен адам өзінің қаншалықты күнә жасағандығын білгенде, намаз оқушының алдын кесіп өткенше, қырық тоқтап, күте тұрғаны жақсырақ болар еді» деген.
Демек, мешітке келген намазхан, адамның жүріп-тұруына кедергі болмайтын жерді таңдағаны қайырлы екен.
Икрам АЙТАЕВ
