Сұрақ: Хиджама жасау дұрыс па?
Жауап: Хиджама – мұсылман елдерінде кең таралған денеден қан алдыру әдісі. Халық арасында хиджама жасату денсаулыққа пайдалы деген түсінік қалыптасқан. Ол Исламның парыз, уәжіп амалдарына жатпайды.
Хиджама жайлы пайғамбарымыздың (с.а.у.) хадистері бар. Бір хадисінде: «Қан алдыруда шипа да, береке де бар» деген.
Құрғақ хижама түрі – банкі қойылып, вакуум жасалады, бірақ қан шығарылмайды. Ылғалды (қанды) хижама түрі – теріге кішкене тілік жасалып, шыны не бамбуктен жасалған банкілер арқылы аз мөлшерде қан шығарылады.
Қазіргі таңда екінің бірі хиджама жасауға әуес. Әуестен туындаған мұндай жағдайлар адамның денсаулығына кері әсер тигізіп жатқан жағдайлар кездеседі. Хиджама жасау мәселесін медицина аса құптамайды. Себебі инфекция жұқтыру, жараның дұрыс жазылмауы, терең кесілсе қауіптің асқынуларға соқтыратынын алға тартқан.
Хиджаманы медициналық стандарттарды сақтайтын, тазалыққа мән беретін маманның жасауы өте маңызды екенін ұмытпағанымыз жөн.
Икрам АЙТАЕВ
