Сұрақ: Діни экстремистік іс-әрекеттерге не жатады?
Жауап: «Экстремизм» сөзі шектен тыс іс-әрекеттер мен көзқарастар деген мағынаны қамтиды. Яғни, діни экстремизм – діни сенімдерді бетперде етіп, зорлық-зомбылықты, діни алауыздықты, төзімсіздікті, діни радикалды әрекеттерді насихаттау немесе жүзеге асыру.
Мұндай іс-әрекеттер ұлттың қауіпсіздігіне, қоғамның тыныштығы, бірлігі мен тұрақтылығына қатер төндіреді.
Діни экстремистік әрекеттерге:
- «Жиһад» деп қарулы қақтығысқа шақыру;
- басқа дін өкілдерін немесе дінді ұстанбайтындарды жоюға үндейтін уағыздар тарату;
- шариғат заңын мемлекеттің жалғыз заңы ретінде орнатуды ұсыну;
- намаз оқымағандарды «кәпір» деп айыптау;
- діни радикалды уағыздарды, видеоларды, кітапшаларды тарату;
- әлеуметтік желілерде зорлық пен діни алауыздыққа шақыратын жазбалар жазу;
- адамдарды шетелдік заңсыз діни оқу топарына тарту,
- радикалды көзқарасты ұстануға үгіттеу,
- діни себептері негізінде мемлекеттің заңдарына бағынбау,
- балалардың дүниетанымына әсер етіп, міндетті орта білімнен бас тартуға итермелеу, т.б. жатады.
Аталған діни экстремистік іс-әрекеттерге барған адамға қылмыстық жауапкершілік бар екендігін ұмытпайық.
Икрам АЙТАЕВ
