Жапон халқының құмыра жасаушы ұсталарында «кинцуги» деп аталатын әдіс түрі бар екен.Енді ғана жасалып, күйдіріліп, дайын болған құмыраны әдейілеп қайта сындырып, сынған құмыраны қайтадан желімдей бастайды. Желімдей отырып, әрбір сынған жерді алтынмен, күміспен әрлеп, немесе маржан тастар қойып шығады. Жұмыс біткенде, бағанағы сынған құмыра танымастай болып өзгеріп, әсем күйге айналады.
Адамның мінез-құлқы психологиясын зерттеуші ғалымдар осы жағдайды сараптай келе:«Адам баласы да кімде-кіммен қарым-қатынасы бұзылатын болса, осы сынған құмыраны желімдегендей, бұзылған ара-қатынасты жөндеп, одан ары жақсарта білу керек» деп айтатын көрінеді.
Атам қазақ осыны: «Таспен атқанды аспен ат» деп бір-ақ ауыз сөзбен түсіндірген.
Әлбетте, дінімізде әрбір мұсылман адам мүмкіндігінше көркем мінезді, кешірімді болуға тиіс екені жөнінде аят, хадистер көптеп келген. Алла Тағала Құран Кәрімде: «Жақсылық пен жамандық тең емес. Жамандықты ең көркем түрде жолға сал. (Жамандыққа қарсы жақсылық қыл). Сол уақытта сені мен екеуің араңда дұшпандық болған біреу, өте жақын достай болып кетеді» деп бұйырған. (Фуссиләт: 34)
Әрине, бұл сөзбен емес, амалмен ғана шешілетін мәселе. Сынған құмыраны желімдегендей, арамызды да татуластырып, жақсарту – міндетіміз. Сондықтан барынша осы аят, хадистерге амал етуге тырысуымыз қажет.
Алла баршамызға көркем мінезді, кешірімді болуды нәсіп етсін!
Қуат ҚАБДОЛДА
