Сұрақ: Қошемет көрсетіп, қол шапалақтау дінге қайшы емес пе?
Жауап: Қоғамда мәдени іс-шараларда, жақсы сөз айтылғанда, жетістікке жеткенде, сахнада өнер көрсеткенде, т.б. жағдайларда қол шапалақтап қошемет көрсету – әдептіліктің бір түрі. Қол шапалақтаудың ниеті құлшылық мақсатында болса, Ислам құптамайды. Ал адамға қошемет көрсету үшін қол шапалақтау діни сипаттағы амалдардан емес. Мұндай мақсатта қошемет көрсетіп, қол шапалақтауда діни тұрғыдан тыйым жоқ.
Мешіт сынды құлшылық орындардың қасиетін, әдебін сақтау қажет. Ол жерде өзіне лайықты Аллаға мадақ сөздері айтылады. Қол шапалақтап қошемет көрсетудің өзіндік орындары мен жағдайлары бар екенін ұмытпаған абзал.
Кейбір діни топтар салт-дәстүр мен мәдениетті дінге жат деп адасып, адастырып, бүлік шығарып жүретіні аян. Мұндай жат ағымдардан сақ болғанымыз абзал.
Икрам АЙТАЕВ
