Сұрақ: Исламда үлкенге құрмет жайында не айтылған?
Жауап: Исламда білім мен тәрибенің орны бөлек. Дінде үлкендерді қадірлеуде, кішілерге ізет көрсетуде үлкен сауап бар. Оларға құрметсіздік көрсету немесе жағымсыз іс-әрекеттерге бару – күнә амалдардан.
Қазіргі таңда қоғамда үлкендерге дөрекі сөйлеп ренжітіп жатқандар, түрлі жағымсыз былапыт сөздер айтатындар, үлкендерге қол көтеретіндер жиі кездеседі. Мұндай қасиетсіз, арсыз, қайырсыз болудан Алла сақтасын.
Жақсылыққа жақсылық етіп жетуімізді ұмытпайық. Үлкендерге шамаң келгенше құрмет көрсетіп, ата-анаңның батасын алудан қайырлы амал жоқ. Ал бойымдағы барлық жаман қасиетке ата-анам кінәлі, маған дұрыс тәрбие бермеді деу – надандық.
Пайғамбарымыз (с.а.у.) хадисінде: «Кім кішімізге мейірімділік танытпаса, үлкеніміздің шарапатын білмесе, бізден емес» десе, тағы бір хадисінде: «Адамдарға мейірімділік танытпағанға, Алла Тағала да мейірімділік танытпайды» деген.
Үлкенге құрмет, кішіге ізет көрсете білу – иманды жақсы амалдардан екен. Нәпсіге ие болып, тәкаппарлық пен надандық дерттерден аулақ болайық.
Икрам АЙТАЕВ
