Сұрақ: Ата-анаға қиянат жасағандар қандай жаза тартады?
Жауап: Адам үшін дүниеде ең қымбат жан – оның ата-анасы. Құран аяттары мен хадистерде ата-ананың орнын ерекше дәріптеп, оларға қандай жағдай болмасын құрметпен, жауапкершілікпен қарауды міндеттеген. Яғни, Алла оларға құрмет пен жақсылық жасауды Өзінен кейінгі кезекке қойған.
Өкінішке қарай, қазіргі қоғамда ата-анасына жақсылық жасаудың орнына құпия немесе жария түрде зәбірлік, зұлымдық көрсететіндер мен оларға дауыс көтеріп ашық қарсылық танытатындар бар. Мұндай әрекеттерге жүрегі қарайған, адамдық қасиеттен жұрдай болғандар барады. Ата-анаға зәбір көрсету, сол сияқты жағымсыз әрекеттерді Ислам діні қаралап, ауыр күнәларға балайды. Бұл жайлы көптеген хадис бар.
Пайғамбарымыз (с.а.у.) хадисінде: «Алланың ризалығы – ата-ананың ризалығында. Алланың ашуы – ата-ананың ашуында» десе, тағы бір хадисінде: «Барлық күнәлардың жазасы Алла Тағаланың қалауымен қиямет күніне дейін кешіктірілуі мүмкін, алайда ата-анаға құрметсіздік танытқан адамның жазасын осы өмірде өлім келмей тұрып береді» деген.
Демек, ата-ана баланың ең үлкен аманаты екен. Оларға қиянат жасау – Аллаға қиянат жасағанмен тең. Ата-ананың разылығын алып, Алланың ризашылығына бөлене берейік.
Икрам АЙТАЕВ
