Сұрақ: «Аллаһу акбар» сөзін қандай жағдайда қолданады?
Жауап: «Аллаһу акбар» сөзінің мағынасы «Алла ең ұлы» дегенді білдіреді. Пайғамбармыздың (с.а.у.) хадистерінде «Субханаллаһ», «Әлхамдулилла», «Лә иләһә илләллаһ», «Аллаһу акбар», «Астағфирулла», т.б. зікір сөздері көп айтылған. Аталған сөздер Алланың жалғыздығын, құдіретін, ұлылығын білдіреді.
«Аллаһу акбар» зікір сөзі – Исламда көп қолданатын сөздердің бірі. Бұл сөзді мұсылман қауымы намаз оқығанда, азан айтқанда, намаздан кейін дұға жасағанда Жаратушыны мадақтау мақсатында және қуаныш, шүкіршілік кезінде Алланы еске алып жиі айтлады. Аталған жағдайларда айтылу дінде құпталған амалдардан.
Ал қазіргі таңда әлеуметтік желілерде экстремистік, террористік іс-әрекеттер барысында жиі айтылып, адамдар арасында теріс әсер қалыптасқан. Сондай-ақ, саяси мақсатта қорқыту, насихат немесе қатты дауыспен басқаларды шошыту мақсатында қолдану Ислам әдебіне жат әрекет.
Дәстүрлі Исламда орнымен, жүрекпен «Аллаһу акбар» сөзін айту сауапты іс саналады.
Икрам АЙТАЕВ
