Бүгінгі таңда зайырлылық ұғымы – көптің назарында тұрған маңызды мәселе. Өкінішке қарай, қоғамның бір бөлігінде «зайырлылық – атеизм», «дінге қарсы бағыт» деген қате түсінік қалыптасқан. Ал шындығында зайырлылық – адамның дінге сенуіне де, сенбеуіне де толық мүмкіндік беретін өркениетті қоғамның басты қағидасы.
Қазақстан өзін зайырлы мемлекет ретінде жариялаған. Бұл – ешбір діннің мемлекет тарапынан артықшылыққа ие етілмейтінін, діни бірлестіктердің мемлекеттің жұмысына араласпайтынын, ал мемлекет діни ұйымдардың ішкі ісіне қол сұқпайтынын білдіреді. Конституцияда әрбір азаматтың ар-ождан және дін бостандығына кепілдік беріліп, ешкімді нанымы, тілі, ұлты, жынысы немесе діни көзқарасына қарай кемсітуге жол берілмейтіні тайға таңба басқандай жазылған.
Зайырлылық – мемлекеттің саяси ұстанымы, ал атеизм – адамның жеке таңдауы. Бірін екіншісімен шатастыруға болмайды. Атеизм – Құдайға сенбеу болса, зайырлылық – сенушіге де, сенбейтінге де тең құқық беретін әділетті жүйе.
Кейбіреулер «зайырлылық діннің дамуына кедергі келтірмей ме?» деген сұрақ қояды. Жоқ, керісінше, зайырлы қағида діннің дамуына жол ашады. Өйткені ол сенушілердің құқығын қорғайды, діни сеніміне байланысты қысым көрсетпеуді қамтамасыз етеді. Бірақ діни ұйымдардың саяси істерге араласуына, мемлекет атынан әрекет етуіне де заңдық шектеу қояды. Бұл – қоғамда тұрақтылықты сақтаудың негізгі шарты.
Зайырлылықтың арқасында елімізде:
әр азаматтың діни сеніміне қарамай тең құқық сақталады;
пікір алуандығына, сөз бостандығына жағдай жасалады;
түрлі дін өкілдері бір шаңырақ астында бейбіт өмір сүре алады.
Қазақстан осы үлгі арқылы шығыс пен батыстың, ислам мен христиан өркениетінің арасын жалғап, әлемге татулық пен келісімнің үлгісін көрсетіп отыр. Елорданың төрінде өтіп жүрген Әлемдік және дәстүрлі діндер көшбасшыларының съездері – осының айқын дәлелі.
Қорыта айтар болсақ, зайырлылық – дінді жоққа шығару емес, қайта барша азаматтың ар-ождан еркіндігін қамтамасыз ететін жалпыға ортақ жүйе. Ол Қазақстанның тәуелсіздігі мен тұрақты дамуының берік негізіне айналды. Сондықтан мемлекетіміздің зайырлы сипаты – болашақ өркендеудің кепілі, ұлт бірлігі мен бейбіт өмірдің алтын діңгегі.
Жасұлан БАҚЫТБЕК
