1–2 тамыз күндері Қырғызстанда дәстүрлі мәдениет пен музыкаға арналған алғашқы «Рух-санаты» Дүниежүзілік фестиваль-байқауы өтті.
Дәстүрлі өнер саласындағы ірі халықаралық фестивальге 37 елден келген жүзден астам орындаушы қатысты. Қазылар алқасының құрамында түрлі елдерден келген танымал музыка зерттеушілері, этнографтар мен өнер шеберлері болды. Олар қатысушылар орындаған шығармалардың түпнұсқасы сақталуын, дәстүрлі музыкалық аспаптарды меңгеру деңгейін және ұлттық мәдени дәстүрлердің сақталуын бағалады.
Қазақстан атынан фестивальге К.Байсейітова атындағы Қазақ ұлттық өнер университетінің студенті Салтанат Ерсұлтан қатысты. Салтанат «Анимациялық кино режиссурасы» мамандығын тәмамдаған, қазіргі кезде университетте «Дәстүрлі ән» бағыты бойынша 3-курста оқиды.
Байқау барысында Салтанат Асан Қайғының толғауын, Нартайдың термесін және Елмұра Жаңабергеннің «Аралым» атты шығармасын орындады. Өнерпаз қыл қобызда жыр-терме орындап, қазылар алқасын тәнті етті. Осылайша ол жеке орындаушылар арасында бірінші орынды иеленді.
Қазақстан Республикасының Мәдениет және ақпарат министрлігі Салтанат Ерсұлтанды жарқын жеңісімен шын жүректен құттықтайды. Дәстүрлі мәдениет пен музыканы сақтау және дамыту – ұлттық мұраны келер ұрпаққа насихаттаудың бірегей жолы.
Мұндай жас дарындардың жетістігі жаңа буынға шабыт сыйлап, халықаралық мәдени байланыстарды нығайта түсері сөзсіз.
Мәдениет және ақпарат министрлігінің баспасөз қызметі
