Кезінде Йеменде білім алып қайтқан Арман ұстаз елге келгеннен соң, үлкен шейх болған ұстазына хабарласса:
– Арман балам, маған қалымды сұрап қана хабарлас. Бірақ, пәтуа сұрама, өз еліңнің мүфтилерінен сұра. Мен ол жердің ахуалын білмеймін. Мен өзім тұрған жерге ғана пәтуа бере аламын, – депті.
Сол сияқты, кезінде тарихта мынадай оқиға болған екен. Африканың арғы жағынан бір мұсылман елші болып Мәдинаға келіп, имам Мәлікке жолығып, қырық сұрақ қойып, төртеуіне ғана жауап алады. Әлгі адам: «Мені Сізге осы қырық сұраққа жауап алып кел деп елші қылып жіберді. Бірақ, мен Сізден төрт-ақ сұраққа жауап алдым, қалғанына не деп айтып барамын?»дейді.
Сонда, имам Мәлік: «Мәлік білмейді деп айтыңыз» деп жауап беріпті.
Міне, бұл дегеніміз ілім алдында, дін алдында адалдықтың белгісі. Сондай-ақ нағыз ғалым адамның жауабы.
Өкінішке қарай, қазір кейбір жастар басқа елдің ғалымдарына, пәтуаларына сүйеніп, ел арасында фитна шығуына себеп болып қалып жатады. Біз осы мәселеде өте сақ болуымыз қажет.
Пайғамбарымыз (Алланың салауаты мен сәлемі оған болсын) имам Дәрими риуаят еткен хадисте: «Пәтуаға жармасқандарыңыз – тозаққа жармасқандарыңыз», – деген.
Аллаға шүкір, бір мәселеде сұрақ туындаса, елімізде жауап бере алатын имамдарымыз, пәтуа беретін мүфтиятымыз бар. Алла бізді адастырмай, тура жолында жүруге жазсын!
Қуат ҚАБДОЛДА
