30 маусымда еліміздің заңнамасына қоғамдық орындарда қыз-келіншектердің бет-жүзін толық жабатын киім (никаб, пәренже, т.б.) киюіне тыйым салатын талаптың енгізілуі бүгінде желіде жаппай талқыға түсіп жатыр. Қауіпсіздікті арттыруға бағытталған бұл қадамның мақсатын сан-саққа жүгірткендер де жетіп-артылады.
Көзіқарақты оқырман бұл шешімнің артында қоғамдық қауіпсіздікті нығайтуға бағытталған ізгі ниет жатқанын ұғынғанына шүбә жоқ. Дін мамандары да солай дейді. Бас мүфтидің кеңесшісі Смайыл Сейітбековтің айтуынша, Ислам дінінде ерге де, әйелге де әурет жерін жауып жүру – міндет. Соның ішінде имандылыққа бет бұрған мұсылман қыз-келіншектеріне өздігінен көрінетін жерінен басқа жерін жабу талап етілген.
«Пайғамбарымыз (с.ғ.с.) өздігінен көрінетін жері дегенде, әйелдің бет-жүзін, білезіктен әрі қолын және тобықтан төмен аяғын көрсеткен. Шариғатта бұл жерлерді жауып жүру бұйырылмаған. Яғни асыл дініміз қыз-келіншекке орамал тағып, ұзын етекті кең киім киюді міндеттегенімен, бетті толық жабуды талап етпейді. Бәлкім, бұл кейбір араб елдерінде қалыптасқан дәстүр шығар. Ал біздің ата-бабамыз хадисте айтылған талапқа байланысты діні мен дәстүрін сабақтастырып, шариғат талаптарына жауап беретін ұлттық киімдерімізді киді. Қазақстан мұсылмандары діни басқармасының ұстанымы да осы» дейді ол.
Өкінішке қарай, әлеуметтік желіде кейбір жат ағым өкілдері заңнамадағы өзгерісті дінге қарсы бағытталған қадам, мұсылмандардың дін ұстану құқығын шектейтін норма деп түрлі пікір таратып жүр. Дегенмен дін мамандары олардың бұл сөздері негізсіз екенін айтып келеді. Бас мүфти кеңесшісі С.Сейітбековтің сөзінше, біз – ең алдымен зайырлы елміз. Сондықтан заңға бағыну – баршаның мойнындағы басты борыш.
«Зайырлы мемлекеттің заңы әркімге ортақ. Мейлі дін ұстан, мейлі ұстанба, біз жеті рет өлшеп, бір рет кесілген заң талаптарын орындауға міндеттіміз. Сондай-ақ бетті жабуға тыйым салатын заң нормасы қылмыстың алдын алу үшін қабылданғандықтан, оның мұсылманның құлшылығына, дін ұстануына ешқандай қатысы жоқ. Шариғатта бетті толық жабуға бұйрық болмағандықтан, бұл заң мұсылманның дін ұстану құқығын, амалын, бостандығын шектейді деу – келте пайым. Кейбіреулер айтып жүргендей, заңдағы өзгерісті дінге қарсы бағытталған қадам деген пікірмен өз басым келіспеймін», дейді ол.
Шымкент қалалық дін істері басқармасы «Дін мәселелерін зерттеу орталығының» теологі Икрам Айтаев та жаңа заң талабы дін саласына ешқандай қатысы жоқ құқықтық шешім екенін алға тартады. «Қоғамдық қауіпсіздік – қазір кез келген елдің ең басты назар аударатын мәселесі. Өйткені жұрттың күнделікті тіршілігі жайлы, ұйқысы тыныш. Өкінішке қарай, қылмыскерлер арасында бет-жүзін жасырып алып, зымиян ойын іске асыратындар да бар. Тәртіп сақшылары олардың кім екенін анықтай алмайтын болғандықтан, осындай құқықтық шешім шығаруға мәжбүр болып отыр.
Аталған заң нормасы күшіне енгеннен кейін Қазақстан мұсылмандары діни басқармасы да осы мәселеге қатысты түсініктеме бергені белгілі. Мамандар мұсылман әйелдерінің киіміне қатысты Құран мен хадис талаптарын тізбектей келе: «Біз еліміздегі мұсылмандардың біртұтас діни бірлестігі ретінде, қоғамдағы тұрақтылық, ынтымақ пен бірлікті басты құндылықтарымыздың бірі деп бағалаймыз. Ислам діні де қоғаммен жарасымды өмір сүруді, тәртіпке бағынып, мемлекеттің тыныштығына үлес қосуды насихаттайды. Сондықтан да заңға түсіністікпен қарап, ортақ игілік жолында бірлігімізді бекемдейік» деп тұжырымдайды.
Расында, дінде намаз, ораза, қажылық, зекет секілді парыз емес, шариғатта міндеттілігі мүлдем айтылмаған, сондай-ақ біздің ата салтымызда да көрініс таппаған пәренжеге тыйым салынуы қоғам үшін пайдасы басым қадам болғаны айдан анық. Сол үшін ел ішін дүрліктіру, дінімді шектеді деп дүрбелең салу, бүлік шығарудан аулақ болғанымыз абзал.
