Науқастың көңілін сұраудың сауабы қандай?

Сұрақ: Науқастың көңілін сұраудың сауабы қандай?

Жауап: Сырқаты бар адамдар Алланың, сосын дәрігерлердің арқасында еміне шипа тауып жатады. Дерті барларға Алла шипасын берері хақ. Сол себепті мұсылман адам ауырып қалған жағдайда шипасын Алладан сұрап, оның себебін жасап, емделуге тиіс.

Науқастарды дәрімен ғана емес, жылы сөздерімен жұбатып, шама келсе қаржылай көмек қолдарын созып, тәуір болып кетуге септігін тигізудің өзі үлкен азаматтық. Ал науқастың көңілін сұрау – Исламда өте сауапты, маңызды амалдың бірі. Науқастың көңілін сұрау адамгершілік пен мейірімділік белгісі ғана емес, сонымен қатар мұсылман бауырлар арасындағы сүйіспеншілікті арттырады. Сондай-ақ, мұсылмандар бір-біріне жанашырлық танытады, рухани байланыс нығаяды және Алланың разылығына бөленеді.

Пайғамбарымыздың (с.а.у.) өзі сахабаларына сырқаты бар адамның көңілін сұраудың қажеттілігін және ол амалда Алланың ризашылығы бар екенін ескерткен. Хадисте: «Науқастанып қалған кісінің көңілін сұрап барған адам Алла Тағаланың рахымына батады, егер ол кісінің, жанында отырса, Алланың рахымына бөленеді» деген.