Сұрақ: Мұсылман бауырың үшін дұға етуге бола ма?
Жауап: «Дұға» сөзінің сұрау, шақыру, қалау, жәрдем өтіну деген мағыналары бар. Яғни, Алладан шынайы ниетпен мұң-мұқтажын өтеуге жәрдем, көмек сұрау.
Мұсылман адамның басқа бір бауыры үшін дұға етуі – Исламда құпталған сауапты амалдың бірі. Бұл бауырмалдық пен ықыластың белгісі. Мақсат – қиыншылық көріп жүрген және науқас адамға шипа тілеу, жақсылық, береке, амандық тілеп, кешірім сұрау. Дұғаны белгілі арабша мәтіндері немесе қазақша мазмұнда жасауға болады. Қазақ дәстүріндегі бата мен дұғаның түрлерін де ұмытпағанымыз жөн.
Пайғамбарымыздың (с.а.у.) хадисінде: «Мұсылман кісінің бауыры үшін сырттай жасаған дұғасы сөзсіз қабыл болады. Ол (бауырына) бір жақсылық тілеген уақытта жанындағы періште: «Әмин! Саған да солай болсын!» деп тілеп тұрады» десе, тағы бір хадисінде: «Алла тағала өзіне дұға жасаған барлық адамның тілегіне жауап береді. Оның дұғаларға жауап беруі – дұға жасаған адамға сұрағанын беруі арқылы, яки, дұғасының сауабын ақыретке жинауы немесе жасаған дұғасының көлеміндей күнәсін кешіруімен болады» деген.
Шынайы ықыласпен істелген дұға-тілектеріңіз қабыл болсын!
Икрам АЙТАЕВ
