Сұрақ: Лағынет айтудан қалай сақтанамыз?
Жауап: «Лағынет» сөзі ұзақтату, жақсылықтан алыстату деген мағына береді. Ол балағаттауды, жаман тілекті, қарғысты білдіреді. Адамдар сөз арқылы келетін қауіптің салмағын білмей, «атаңа лағынет» сынды сөзді жиі қолданады. Лағынет болсын дегеніміз – Алланың мейірімінен ұзақ болсын дегенді білдіреді. Адамның аузынан шыққан жақсы да, жаман сөз періштелердің «әмин» дейтін сөздеріне сәйкес келіп қалса қабыл болатыны бар. Осылайша, орынсыз ауыздан шыққан сөздер адамдарды көптеген күнәларға батырады.
Дәстүрлі Ислам адамдардың сыртынан немесе бетіне қарап лағынет сынды (қарғыс) жаман сөз айтуды күнәға балап, одан қайтарады. Абдулла ибн Амрден (р.а.) келген риуаятта: «(Бірде) Алла елшісі (с.а.у.): «Расында, үлкен (күнәлардың) ең үлкенінің бірі – кісінің өз ата-анасын лағынеттеуі» деді. (Адамдар): «О, Алланың елшісі, кісі өз ата-анасын қалайша лағынеттейді?» – деп (сұрағанда, ол): «Бір кісі бір кісінің әкесін балағаттаса, ол мұның әкесін балағаттайды, анасын балағаттаса, мұның анасын балағаттайды» – деген.
Жақсы сөз айту қайырлы амалдардан екенін ұмытпайық.
Икрам АЙТАЕВ
