Сұрақ: Басқа дін өкілімен дос болуға рұқсат па?
Жауап: Ислам – бейбітшілік діні. Әр ұлт пен дін өкіліне құрметпен қарайды. Ешкімді дініне, ұлтына, нәсіліне және жынысына қарап бөлмейді. Қандай дін өкілі болмасын, ол адам болғандықтан құрметтелуі тиіс. Кімде-кім адамның дініне, түр-сипатына, тіліне, ар-намысына тиіп, кемсітетін болса, ол Алланың жаратылысына қарсы келген саналады.
Пайғамбарымыз (с.а.у.) заманында мұсылманның басқа дін өкілімен қандай қарым-қатынаста болу керектігінің үлгісін өнеге ретінде көрсетіп кеткен. Ол өнегеде «жек көру», «қырып-жою», «қарым-қатынаста болмау керек» деген насихат жоқ. Мұндай насихаттар деструктивті діни ағымдарға тән дүние.
Дәстүрлі Ислам ешкімді діни сенімі үшін айыптап, балағаттауға бұйырмайды. Керісінше бір қоғамда дұрыс қарым-қатынаста және ынтымақта болуға шақырады.
«Маида» сүресінің 5-аятында: «Бүгін сендерге таза нәрселер халал етілді. Кітап берілгендердің де (яһудилердің де, насаралардың да) тамағы (бауыздағандары) сендерге халал қылынды. Сендердің тамақтарың оларға халал…» деген.
Басқа дін өкілдерімен дос болу, дұрыс қарым-қатынаста болу шариғатқа қайшы емес.
Икрам АЙТАЕВ
