Шетелге барып діни білім іздеу – кейбір жастардың асқақ арманы. Алайда әрбір асылдың ішінде арам да араласатынындай, мұндай жолдың да игілігімен бірге қатері қатар жүреді. Көптеген шәкірттер шеттен іліммен ғана емес, сол өңірдің жат салтын, тіпті ең қауіптісі – теріс сенімін де ала келгенін көз көрді. Сан ғасырдан бері қалыптасқан қазақтың дәстүрлі дүниетанымына қайшы ұстанымдарды дәріптеп, ел ішіне бүлік дәнін сепкендері де ақиқат.
Бүгінгі таңда еліміз бұл қауіптің бетін қайтаруға бар күшін салуда. Медреселер мен университет ашылып, заманауи талаптарға сай діни білім беру жүйесі қалыптасты. Бұған қоса, өзге мұсылман мемлекеттерінің ресми оқу орындарымен ынтымақтастық орнатылып, жастарға адастырмайтын айқын жол көрсетілуде. Бұл – мемлекет тарапынан жасалған үлкен қамқорлық, ұрпақтың дұрыс бағытта тәрбиеленуіне берілген мүмкіндік.
Соған қарамастан, «таза исламды үйретеміз» деген желеумен шетелдегі күмәнді орталықтардың арбауына еріп кетіп жатқан жастарымыз әлі де бар. Мұндай оқу орындарының шын мақсаты – білім беру емес, адамның ойын улап, қоғамнан бөлектеу, зайырлы мемлекетті мойындатпай, радикалды идеологияға жетелеу. Сол үшін де ол жақтан оралғандар арасында елге қайшы, қауымға қауіп төндіретіндер аз емес.
Бұл кеселдің алдын алу – ортақ парыз. Ең әуелі жастарға отандық оқу орындарында да терең діни білім мен өркениетті дүниетаным алуға барлық мүмкіндік бар екенін ұғындыру қажет. Сондай-ақ, ата-ана мен ұстаз баланың ортасын, ойын, қызығушылығын бақылап, дер кезінде жөн сілтей білуі тиіс. Ал ақпараттық қауіпсіздік пен медиа сауат – бүгінгі заманның қалқанындай қорғаны.
Жастардың ғылымға, білімге талпынысы – елдің болашағына салынған алтын көпір. Бірақ ол көпір адасуға емес, ақиқатқа бастайтын жол болуы шарт. Өйткені ұрпақтың рухани тұтастығы – мемлекетіміздің ертеңгі күні, еліміздің баянды болашағы.
Жасұлан БАҚЫТБЕК
