ҚМДБ-ның 35 жылдығына орай Қарағанды қаласында өткен «Әдемі әуезді азаншы» VI республикалық байқауы өз мәресіне жетті.
Игі шараға Бас мүфти Наурызбай қажы Тағанұлы қатысып, байқаудың мән-маңызына тоқталып, қатысушыларға сәттілік тіледі.
«Бұл байқау – азаншылардың тәжірибе алмасуына, өз шеберліктерін шыңдауға, өскелең ұрпақтың қызығушылығын арттыруға бағытталған рухани алаң. Себебі азан – Аллаға ұнамды сөздердің ең сүйкімдісі. Құранда: «Шын! Мен мұсылмандарданмын», – деп, Аллаға шақыра отырып, ізгі іс істеген кісіден сөз тұрғысынан жақсы кім бола алады?» делінген – деді Бас мүфти.
Азаншылар сайысына ҚМДБ Құран секторының меңгерушісі Серік Ахмет, «Қауам ад-дин әл-Итқани әл-Фараби әт-Түркістани» республикалық қарилар дайындау орталығының директоры Садуақас қари Олжабаев, Алматы қаласының бас имамы Төлеби қари Оспан, Алматы қаласы Медеу ауданының бас имамы Данияр қари Жұмабаев және Қазақстанның еңбек сіңірген қайраткері, «Құрмет» орденінің иегері Мұсайын Сержан төрағалық етті.
Қазылар алқасының шешімімен бас жүлдені Астанадан келген Базарқан Қайнар (800 000 тг) иеленді. Екінші орынды Батыс Қазақстаннан Асхат Асылбеков (600 000 тг), үшінші орынды Алматы қаласының өкілі Баубек Берліғалиұлы (400 000 тг) жеңіп алды.
Саламат Насихатұлы (Атырау) мен Асылтемір Абдулла (Шымкент) ынталандыру сыйлығына (150 000 тг), ал Сағындық Ахмедиянов (Ұлытау) көрермен көзайымы (100 000 тг) атанды.
