ҚМДБ Төрағасы, Бас мүфти Наурызбай қажы Тағанұлының бұйрығымен «Ақтөбе» медресе-колледжінің директоры қызметіне Ерік Қонақбайұлы Сұлтанов тағайындалды.
Жаңа басшыны ұжымға ҚМДБ «Діни білім және кадр даярлау» бөлімінің меңгерушісі Хасан Аманқұлов таныстырды. Ол Ерік Қонақбайұлына сәттілік тілеп, жауапты қызметіне береке мен табыс тіледі.
Салтанатты іс-шара барысында осыған дейін медресе-колледж директоры қызметін абыроймен атқарған, РАНТ мүшесі Әбдімүтәлі Қайназарұлы Дәуренбековке иығына шапан жабылып, ҚМДБ тарапынан алғыс хат табысталды.
Ерік Қонақбайұлы Сұлтанов — Ақтөбе облысы, Әйтеке би ауданы, Қарабұтақ ауылдық округінің тумасы. Ол «Ақтөбе» медресе-колледжінің және «Нұр-Мүбарак» Египет ислам мәдениеті университетінің түлегі. Сонымен қатар Шет тілдер және іскерлік карьера университетінде «Дінтану» мамандығы бойынша магистратураны тәмамдаған. Араб және орыс тілдерін жетік меңгерген. Отбасылы. Діни салада 9 жылдық тәжірибесі бар.
Еңбек жолын 2016 жылы Алматы облысы, Байсерке елді мекеніндегі «Хайыр Ихсан» мешітінде ұстаздық етуден бастаған. 2017 жылы Батыс Қазақстан облысы, Жаңақала аудандық мешітінің бас имамы қызметін атқарды. 2020 жылдың 28 шілдесінен бастап бүгінге дейін Хромтау аудандық «Нұр» мешітінің бас имамы әрі ауданның бас имамы қызметтерін абыроймен атқарды.
