Бас мүфти Наурызбай қажы Тағанұлының бастамасымен қолға алынған «Әдемі әуезді азаншы» VІ республикалық жарысына Алматы қаласы бойынша мешіт азаншылары арасында іріктеу сайысы өтті.
Іріктеу сайысы Наурызбай ауданы «Әбу Бәкір» мешітінде ұйымдастырылып, қаланың Бас имамы Төлеби Дәділұлы сайыс шымылдығын ашты. «Ардақты Пайғамбарымыз (оған Алланың салауаты мен сәлемі болсын) хадисінде: «Кімде кім жеті жыл бойы сауабын үміт етіп азан айтса, ол тозақ отынан құтылады», деп сүйіншілеген болатын. Осынау хадис негізінде қала халқын әдемі әуезбен намазға шақырып жүрген қызметтеріңізге табыс, отбасыңызға амандық, өмірлеріңізге береке тілеймін», – деп атап өтті бас имам.
Сайыс шарты намазға шақырушы негізгі рәміз – азанды көркем, әсем, дұрыс айту болып табылды.
Сайыс қорытындысы бойынша жүлделі 1 орын – (100 000 тг.) Әуезов ауданы «Ақсай» мешітінің наиб имамы Баубек Бердіғалиұлына бұйырды. 2 орынды – (70 000 тг.) «Фирали Ферғанаұлы» мешітінің ұстазы Сайед Саражуддин Ғаффар алса, 3 орынды – (50 000 тг.) «Әбу Бәкір» мешітінің наиб имамы Ердаулет Әбдірасилов қанжығасына байлады.
Жеңімпаз азаншы Баубек Бердіғалиұлына «Әдемі әуезді азаншы» VІ республикалық жарысына жолдама берілді.
