Сұрақ: Құрбандық малының етінен қасапшының ақысы деп беруге бола ма?
Жауап: Құрбан айт күндері Алланың ризашылығы үшін құрбандық малдары сойылады. Оның етін үш бөлікке бөліп тарату – мұстахап (ұнамды) амал. Бір бөлігін әлеуметтік жағдайы төмен мұқтаж жандарға таратуына, екінші бөлігін өзінің отбасына алуына, үшінші бөлігін ағайын-туыс, көршілеріне беруіне болады. Сондай-ақ құрбандық еттерін толық мұқтаж жандарға таратамын десе ерік өзінде.
Ал құрбандық малын союға қызмет жасаған қасапшыларға ақысы ретінде құрбандық еттерінен емес, ақшалай бергені дұрыс. Бұл жайлы сахаба Әлиден (р.а.) келген риуаятта былай делінген: «Алланың Елшісі (с.а.у.) түйелер құрбандыққа шалынған уақытта басында тұруымды және терілері мен жүндерін таратуымды бұйырды. Олардың ешбір нәрсесін қасап ақысы ретінде беруге маған тыйым салды. «Қасап ақысын біз өзіміз береміз», деді.
Алла игі амалдарыңызды қабыл етсін!
Икрам АЙТАЕВ
