Сұрақ: Қателік (сәһу) сәждесі қандай жағдайларда жасалады?
Жауап: Сәһу – ұмыту, жаңылысу, шатасу деген мағына береді. Қателік сәждесі намазда жіберген артық немесе кем қателіктердің орнын толтыру үшін, намаз соңында орындалатын қосымша екі сәжде. Үкімі – уәжіп.
Намазды шынайы ықыласпен оқу абзал. Немқұрайлық танытса, адамның ойы бөлінеді. Соның салдарынан намаз толық болмауы мүмкін.
Намаздағы парыздардың (рукуғ, сәжде т.б) бірі орындалмаған жағдайда қателік сәждесі жасалмайды. Мұндай жағдайда намазды қайта оқу керек. Намазда жіберген басқа артық амалдарда сәһу сәждесі жасалады. Сәһу сәждесі соңғы отырыста әт-тахиятты оқығаннан кейін екі жаққа сәлем беріп, қайта «Аллаһу акбар» деп, екі рет сәждеге барып, қайта отырады. Кейін «әт-тахият» дұғасын, салауаттарымен оқып, екі жаққа сәлем береді.
Пайғамбарымыз (с.а.у.) хадисінде: «Кімде-кім намазда шүбәланса, дұрысы қайсысы екенін ойлап намазын қанағаттанған ойына қарай толықтырсын. Сосын сәлем берсін де, қателік сәждесін жасасын, яғни жаңылғаны үшін екі сәжде жасасын» деген.
Икрам АЙТАЕВ
