Алматыда жергілікті деңгейде материалдық емес мәдени мұраны сақтау және орнықты дамыту мәселелеріне арналған қазақстандық сарапшыларға арналған апталық ұлттық тренинг өтті.
Бұл іс-шара Президент Қасым-Жомарт Тоқаевтың тәуелсіздік пен егемендіктің негізі саналатын ұлттық бірегейлікті нығайту жөніндегі тапсырмаларын іске асыру аясында ұйымдастырылды.
Іс-шараның ашылу рәсіміне мемлекеттік және қоғамдық құрылымдардың өкілдері, ғалымдар, мәдениет қайраткерлері мен халықаралық серіктестер қатысты. Тренингке Қазақстанның бес пилоттық өңірінен келген 45 маман, сондай-ақ мұражайлардың, шығармашылық ұйымдардың және дәстүрлі спорт түрлері қауымдастықтарының өкілдері қатысты.
Іс-шараны Қазақстан Республикасының ЮНЕСКО және ИСЕСКО істері жөніндегі Ұлттық комиссиясы мен Азия-Тынық мұхиты өңіріндегі материалдық емес мәдени мұра саласындағы ЮНЕСКО өңірлік оқу орталығы (Бейжің, ҚХР) бірлесе ұйымдастырды.
Материалдық емес мәдени мұра – ауызша дәстүрлер мен эпостар, әдет-ғұрыптар, дәстүрлі ойындар, қолөнер, музыка мен би, ұлттық тағамдар мен халықтық жарыстар сияқты ұрпақтан ұрпаққа берілетін тірі мәдениет. Жаһандану үдерісі күшейген сайын бұл мәдени құндылықтардың жойылып кету қаупі де басым. 2003 жылы ЮНЕСКО материалдық емес мәдени мұраны қорғау туралы конвенцияны қабылдап, мемлекеттердің күш-жігерін біріктіруге бастамашы бола отырып, осы мұраны сақтауға және болашақ ұрпаққа жеткізуге ықпал етіп келеді.
Оқу бағдарламасы мамандардың біліктілігін арттыруға, құжаттаманы неғұрлым дәл жүргізуге, сондай-ақ көшпелі өркениеттің мәдени болмысының ажырамас бөлігі саналатын осы мұраны кеңінен насихаттауға бағытталған.
Мәдениет және ақпарат министрлігінің баспасөз қызметі
